Atualità

OSP – Cun gran maruëia à l assessorat per la scola y cultura ladina tëut a cunescënza che tres i media ti iel unì trat dant che l ne ti uniss’ nia dat n cuntribut culturel a n media ladin nce sce l ie n bensté de l dé da pert dla consulta ladina. L assessorat provinziel lecorda che l bensté dla consulta ladina ne ie nia ublient, che l guviern provinziel tol la decijions sun i cuntribuc provinziei y che la dumandes possa nce unides cialedes do plu avisa.

OSP – L resta me plu puecia enes de tëmp per i sculeies dla scoles d’ert y scoles secunderes dl II. livel per dé jù la dumandes de cuntribuc ala Provizia per l ann de scola 2003/04. L ultim di sarà juebia ai 2 de utober 2003. La dumandes possa unides dates jù te scola o tl ufize provinziel per sustëni scolastich.

OSP - Cun l Di dla Scola Ladina a S.Lenert de Badia à n vënderdi, 5 de setëmber metù man l ann de scola nuef per respunsabli, nsenianc, y culaburadëures dla scoles ladines. L assessëur per la scola y cultura ladina Florian Mussner à purtà dant nuviteies tl ciamp dla scola, ti à dat esprescion ala stima per l lëur di culaburadëures tla scola y ti mbincian truepa forzes per l ann nuef. Do la rujenedes dl ntendënt ala scola ladina Roland Verra, à l prof. Franco Frabboni purtà dant n referat.

OSP – La scola ladina y si particulariteies sarà n vënderdi ai 5 de setëmber 2003 l argumënt zentrel dl cunvëni a S. Lenert de Badia. L assessëur ala scola y cultura ladina Florian Mussner rujenerà ala maestres, ai maestri y ala persones respunsables dla scola.

OSP – L liber nuef dai cursc profesciunei cuntën duta la vela de istruzion che vën piteda dala scoles profesciuneles provinzieles danter setëmber 2003 y dezëmber 2003. L vën pità cursc y seminares che ie prizipalmënter per i ciamps dl servisc, cumerz, aministrazion, ndustria y artejanat, lëur sun l computer, soziel y gastronomia.

OSP – I cursc che vën pitei danter setëmber 2003 y jené 2004 ie sën da cialé do tla edizion nueva dl liber dai cursc „Zeit für Weiterbildung“. La nuvità da chëst iede ie la „plates de ult“ che dà nfurmazion sun plates tl internet, banches dati, y publicazions tl ciamp dl’istruzion y che dëssa dé urientamënt tla gran vela de cursc y seminares tl Südtirol.

OSP - Sculeies de ublianza, studënc de scoles autes, chëi che fej cursc prufesciunei a tëmp plënn tla scoles per lëur da paur y per l tenì cësa, nsci sciche studënc universiteres possa per l ann de scola che à da unì damandé n cuntribut dala Provinzia. "Nchinamo iel unì dat ju 4.705 dumandes", dij l’assessëura ala furmazion Sabina Kasslatter Mur. Aldò dla scoles vel dates defrëntes per de jú chësta dumandes. Tla proscima enes possa la dumandes unides dates ju tl’ufize pruvinziel per assistënza scolastica a Bulsan.

La cumpëida de sculeies tla scoles elementeres y mesanes dla valedes ladines ie aumenteda. N dut saral chëst ann 3.150 sculeies. „D’autonn saral tla scoles elementeres y mesanes de Gherdëina y dla Val Badia 70 sculeies de plu, se ncunforta l assessëur ladin Florian Mussner.

„L dessa vester n duvier de duc i guvierns dl mond, chël de anjenië ca bën i jëuni al mond dl lëur“, chësc se damanda i trëi assessëures ala furmazion Luisa Gnecchi, Sabina Kasslatter Mur y Florian Mussner n ucajion dl di mundiel di jëuni, n merdi ai 12 de agost 2003. For plu jëuni sun dut l mond ie zënza lëur, nsci dij l scrivan generel dla UNO Kofi Annan per l di mundiel di jëuni. „La globalisazion y la tecnica che ie for n evoluzion porta pusciblteies de lëur nueves y se damanda nce for deplù dai jëuni“ nsci i assessëures ala furmazion. Na bona furmazion y preparazion al mestier dessa anjenië jënt jëuna al mond dl lëur, sorissea Gnecchi, Kasslatter Mur y Mussner.

L servisc de trasport per 21.400 sculeies, uni di, ntan l ann de scola 2003/04 ie unì dat pro dal guviern provinziel sun pruposta dl’assessëura Kasslatter Mur. Nce per 600 sculeis y mutons andicapei che muessa ruvé uni di pra scoles, bersots o zëntri de rehabilitazion, à la jonta provinziela dat pro l servisc de trasport.