Atualità

USP - Proiec por y cun la jonëza tles valades ladines de Südtirol é stà l’argomënt prinzipal dla sentada dla consulta ladina dles jones y di jogn che é gnüda tignida en mercui a Urtijëi. La presidënta Michaela Taibon à fat n valgönes propostes de proiec da realisé: tla Val Badia déssel gnì invié ia n proiet de barat cultural cun jones y jogn tl’Uniun Europeica y te Gherdëna déssel gnì metü a jì n bus da de nöt. L’ofize provinzial laûr por y cun la jonëza programëia implü da realisé n valgönes trasmisciuns ladines por la jonëza.

USP - La Repartiziun provinziala Cultura Ladina mët a jì ai 18 de novëmber a La Ila y ai 25 de novëmber a Urtijëi döes sëres de letöra olache i auturs ladins che à davagné le concurs leterar “Auturs ladins scrî ...” liarà dant sües cunties. Dötes les porsones interessades é sambëgn inviades a tó pert.

USP - Te n valgügn dis podarà l’auturia ladina Rut Bernardi pié do le pest „Walter von der Vogelweide“. L’Assessur provinzial Florian Mussner ti fej porchël les mius audanzes y lalda l’auturia por so impëgn por la cultura y le lingaz ladin.

USP - “La scora tles valades ladines y süa storia é na pert importanta dla cultura ladina y de chëra de Südtirol” à alzè fora l’assessur provinzial Florian Mussner pro le dé dla cultura ladina tignì incö a Balsan. La storia dla scora ladina é stè l’argomënt prinzipal dla manifestaziun a chëra ch’al à tut pert rapresentantes y rapresentanc di comuns, dles istituziuns, dla scora, dla scolina y de d’atri ambiënc culturai de trames les valades ladines.

USP - Por le secundo iade vëgnel tignì en vëndres, ai 22 d’otober 2004 le “Dé dla cultura ladina”. Le fin de chësta manifestaziun é chël d’alzè fora tematiches che reverda la mendranza ladina mo che po ince ester d’interès por i atri grups linguistics. L’argomënt de chësc ann é la “Storia dla scora ladina tl tëmp dan y do les Gran Veres”. La manifestaziun vëgn organisada dal Assessorat provinzial por la cultura ladina. Ala manifestaziun tolarà ince pert le Presidënt dla provinzia Luis Durnwalder, l’ Assessur por la scora y cultura ladina, Florian Mussner, l’ Assessuria por la cultura todëscia, Sabina Kasslatter Mur y l’ Assessur por la cultura taliana, Luigi Cigolla.

USP - L plurilinguism ie n pont carateristich dl sistem scolastich tla valedes ladines dla provinzia de Bulsan. L Intendent Roland Verra se à bele tl passà dat ju dassen cun chesc argument. Tla publicazion "Ladinisch.Paritätisch. Mehrsprachig", che ie permò unida ora, val ite avisa sun l tema di lingac tla scoles ladines.

USP – Tl’Europa carateriseda da na culaburazion sëura i cunfins y l marcià globalisà, devëntel for plu mpurtant a cunëscer rujenendes. „Savëi da rujené de plu rujenedes porta vantages“, sorissea i assessëures provinziei ala scoles Florian Mussner, Luisa Gnecchi y Otto Saurer n ucajion dl di dla rujenees de duman dumënia, 26 de setëmber 2004.

USP - Cun truëp ntujiasm y gran nteres ie uni tëut su l forum da chëst ann tenì l ultimo vënerdi tl Ciastel Colz a La Ila. Truëp artisc y nteressëi d’ert ie ruvei caprò da Gherdëina y dala Val Badia per pudëi to pert ala manifestazion metuda a ji dal Assessorat per la Cultura Ladina.

USP – L forum de cultura de n vënderdi ai 17 de setëmber a La Ila traterà dl’ert y de artisc dla valedes ladines. Daviert iel a artisc‘, rapresentanc de lies cultureles y nce a duc i nteressei d’ert.

USP – Do n instà da paussé y da ruvé inó pra frozes scumëncia ncuei lunesc per truep milesc de mutons y jëuni, si educatëues, nsenianc y genitores l ann de scola y scolina nuef. Nscì nce „l mëter man dl’aventura dl mparé nueva“ sciche scrij i assessëures provinziei ala scoles Florian Mussner, Luisa Gnecchi y Otto Saurer te si scrit per l mëner man dla scola.