Atualità

Tratan l’isté mët a jì le Museum Ladin Ciastel de Tor a San Martin de Tor escursciuns acompagnades tla Val di Morins. La pröma escursciun gnarà metüda a jì en mercui, ai 29 de jügn.

USP - Les operes dl scultur ladin Otto Irsara da La Ila sarà da odëi tratan les edemes che vëgn tl Museum Ladin Ciastel de Tor a San Martin de Tor. Pro la inauguraziun dla mostra en vëndres, ai 24 de jügn saràl ince presënt l’assessur ala cultura ladina Florian Mussner.

USP – L Istitut Tecnich Cumerziel (ITC) “Raetia” y la Scola d’Ert Prufescionela Provinziela dëssa unì nluegedes te na frabica sun la spersa dl ITC. A chësta dezijion ie unic ncuei ai 14 de juni l Assessëur provinziel per i lëures publics, Florian Mussner, l Diretëur de departimënt Josef March, l’Assessëura cumenela Elisabeth Baur, i Diretëures de scola Otto Moling y Julius Senoner, l Ntendënt per la Scoles Ladines Roland Verra y l Diretëur de Repartizion Alexander Prinoth. Mo tl scumenciamënt de juni dl 2006 dëssel unì metù man cun l frabiché dla scola nueva.

LPA - USP - L ie for plu suvënz che scoles de rujeneda tudëscia o taliana se damanda material de nfurmazion sun la storia, cultura, usanzes y la rujeneda ladina. A chësta maniera à l assessëur ladin Florian Mussner nciarià l Istitut Pedagogich Ladin (IPL) de lauré ora n cunzet per material didatich per la scoles tudësces y talianes sun la cultura ladina. “Tres chësc cunzet giapa sculeies dl’autra grupes de rujeneda l’ucajion de mparé a cunëscer miec la grupa de rujeneda ladina cun si storia, cutura y rujeneda” sorissea l assessëur. Acioche l vënie nce laurá dl dre vieres, à l IPL fat na nrescida pra la scoles mesanes de rujeneda tudëscia y taliana.

USP - I posc’ de laûr tles scolines ladines ales maestres y assistëntes che é sön la graduatoria provinziala por l’ann de scolina 2005/06 vëgn dà ia en jöbia, ai 9 de jügn a Urtijëi.

USP - La Ciamena di jornalisc nazionala a Roma ti à spôrt n gran lalt al Istitut tecnich comerzial „Raetia“ da Urtijëi por so foliet scolastich „Orange Juice“ metü adöm te na manira ejemplara. N valgügn scolars y insegnanc dl comitê de redaziun à podü pié do ai 24 de mà a Roma n pest da pert de Lorenzo Del Boca, presidënt dla Ciamena di jornalisc nazionala. Le foliet plajor y interessant tëgn ajornà plü iadi al ann la comunité scolastica, mo sambëgn ince i geniturs y d’ atri jogn sön tematiches che reverda la scora, le sport, proiec, tendënzes y en general argomënc por la jonëza.

USP - N gröm de scolares y scolars talians y ladins à tut pert al concurs pro le proiet „Lì…por devertimënt“. I mius laûrs gnarà premià en vëndres, ai 27 de mà 2005 tla scora dl comerz „Claudia De Medici“ a Balsan dal’assessuria provinziala Luisa Gnecchi.

USP - „L se ancunté y se giamië ora de cultures defrëntes ne comporta nia me risich, ma porta nce l’ucajion de se arichì l un cun l auter. La cundizion per arjonjer chësc ie l dialog danter la cultures, te chël che la singula cultura possa crëscer, restan davierta permez al’autra cultures.” Chësc ie l pensier dl assessëur ala scola y cultura ladina per ncuei sada 21 de mei, di mundiel per l svilup culturel numinà dal UNESCO. La cultura ladina, y dantaludt la rujeneda ladina dëssa unì cureda, ajache l ie la basa per la identità culturela de na mendranza, nscì Florian Mussner.

USP - Te chisc dis é Cianacëi tl zënter dl’informaziun por i Ladins. Cotan de jornalistes y jornalisc ladins é rovà adalerch dales cater valades ladines, dala Val Badia, da Gherdëna, Fascia y Fodom y cinamai dala Svizra rumancia por tó pert ala pröma incuntada di jornalisc ladins che à metü man inier jöbia, ai 19 de mà 2005. Chësta incuntada che jarà inant por trëi dis alalungia é gnüda metüda a jì dala Provinzia de Balsan en colaboraziun cun le departimënt ladin. Inier êl ince presënt l’assessur Mussner.

USP - Tres n barat dess la cultura y l’ert dla Val Badia y dl Ahrntal se rové plü dlungia. Les uniuns culturales „EPL“ dla Val Badia y „KUNSTMYST“ dl Ahrntal é tl laûr de mëte a jì deboriada le proiet cultural „Tras(se) Nord-Süd“. Le proiet gnarà presentè en vëndres, ai 20 de mà 2005 tl Museum Ladin Ciastel de Tor a San Martin. Ilò gnaràl ince tignì l’inaudaziun dla mostra coletiva che alda pro le proiet.