Atualità

USP - I geniturs che ô scrì ite sü mituns o sües mitans te üna dles scolines ladines por l’ann 2005/2006 mëss se tó le tëmp por jì n dé dla proscima edema tla scolina de paisc. Les iscriziuns gnarà fates tl’edema dai 17 - 21 de jenà tles singules scolines.

USP - N juebia, ai 9 de dezëmber 2004, à l assessëur ladin Florian Mussner ancuntà reprejentanc dla istituzions di Grijons dla Svizra a Müstair. Te chësta ucajion à i partezipanc rujenà dla puscibltà de na culaburazion tl ciamp dla cultura. Nce l Vizepresidënt dl Cunsëi Regionel Luigi Chiocchetti, l diretëur dl ufize ala cultura dla Provinzia de Trënt Marco Viola y l Presidënt dla Union Generela di Ladins dla Dolomites Giovanni Pellegrini, a tëut pert a chësta ancunteda.

Sciöche preodü dala lege mëssel gnì fat controi sön i contribuc culturai conzedüs dala Provinzia. Le 6% di caji vëgn ciarà do plü avisa dal’aministraziun provinziala: chisc gnarà trac fora a caje ai 15 de dezëmber 2004 te na sentada publica.

Tratan les edemes che é stades à tröpa jënt interessada tut pert ales sëres de letöra y discusciun cun auturs ladins y esperc fora dl monn leterar ladin metüdes a jì a Urtijëi y a La Ila. Le Departimënt por la Cultura ladina che à organisé chëstes sëres de leteratöra se desmostra contënt dl suzès arjunt y programëia porchël ciamò val’ sëra de leteratöra ladina.

Por plü de 100 insegnanc dles scores ladines se tràtera sëgn d’imparè por i ejams. De merz 2005 metarà man i pröms ejams scric dl concurs ordinar por insegnanc dles scores elementares, mesanes y altes. Chësc é stè comuniché dal Ispetur dla scora ladina Lois Ellecosta.

Les lies culturales ladines po presentè domanda de contribut por ativitês culturales ala Provinzia cina ai 31 de jenà 2005 à comuniché l’Assessur ala cultura ladina Florian Mussner. I formulars por fà domanda de contribut gnarà portà dant dal Ofize cultura y scora ladina te döes sëres d’informaziun ai 6 de dezëmber 2004 a Urtijëi y ai 10 de dezëmber 2004 a San Martin de Tor. Dötes les porsones interessades é dër bel inviades.

Tröpa jënt à tut pert ala sëra de letöra y discusciun cun l’auturia Maria Pedevilla y l’autur Ivan Senoner che la Repartiziun provinziala Cultura Ladina à metü a jì l’edema che é stada a La Ila. La proscima sëra de letöra d’autur gnarà tignida en jöbia, ai 25 de novëmber a Urtijëi.

Ince en chësc ann gnaràl tignì ai 20 de novëmber sura döt le monn le “Dé internazional di dërc dl’infanzia”. Chësc dé se basëia sön la Convenziun internazionala aprovada dal’Adunanza dles Naziuns Unides ai 20 de novëmber dl 1989 tla cité de New York. Cina sëgn é la Convenziun gnüda ratificada da 190 paîsc dl monn, tolon fora i Stac Unis y la Somalia.

34 insegnantes y insegnanc dla scora elementara y mesana dles valades ladines à tut pert al scioper nazional protlamè incö lönesc, ai 15 de novëmber 2004. “Tles scores altes n’él stè degügn insegnanc che à tut pert” à lascè al savëi l’Intendënza ladina.

USP - La Repartiziun provinziala Cultura Ladina mët a jì ai 18 de novëmber a La Ila y ai 25 de novëmber a Urtijëi döes sëres de letöra olache i auturs ladins che à davagné le concurs leterar “Auturs ladins scrî ...” liarà dant sües cunties. Dötes les porsones interessades é sambëgn inviades a tó pert.