Atualità

Usp – Da chëst ena ie l Museum Ladin Ciastel de Tor a San Martin de Tor inò daviert per la sajon da instà. Chëst ann an orares de giaurida nueves, nteressei possa nce vijité l Museum Ladin n Lunesc de Pasca domesdi, ai 12 de auril 2004.

Usp – L abiné na luegia de albierch ntan l tëmp de studio cumporta suvënz na gran dificultà. Tl Südtirol iel unì metù sù de plu cëses per studënc che vën presentedes tl cudejel nuef dat ora dal Ufize Provinziel per Assistënza Scolastica y Universitera.

L’Assessorat provinzial por la cultura ladina va inant cun i cursc de ladin dla Val Badia sia por i nia ladins co por i ladins. Dai 4 de mà 2004 inant vëgnel porchël indô pité cursc dagnora tla sënta dl Ofize cultura y scora ladina a Balsan.

Usp – I rapresentanc dla lies cultureles sëuracumeneles de majera mpurtanza y la Uniun Maestri Ladins de Badia à l’ena passeda ancuntà l assessëur ladin Florian Mussner. La prioriteies dl’atività culturela dëssa tl proscimo tëmp ti ji ala sënta nueva per la lies cultureles sëuracumeneles, plu tëmp de trasmiscion tl radio y televijon ladina, la cumiscion per la furmazion di nsenianc ladins, la sënta destacheda dl Istitut Pedagogich Ladin tla Val Badia y la discuscion de basa sun la scola ladina.

LPA – Barbara Tavella che à venciù l cuncors per artisc jëuni ladins „Premia flus d’aisciöda“ ie ncuei, mierculdi 31 de merz unida premieda a Bulsan dal assessëur ladin Florian Mussner. Ad’ëila ti vëniel dat la puscibltà de mëter ora si lëures a Bulsan. A chësta maniera giapa Tavella la puscibltà de lascé udëi si lëures y nsci n pue’ de ert ladina a n majer publich, à dit Mussner.

USP - L’assessur ala scora ladina Florian Mussner à incuntè l’edema passada la comisciun por l’intregraziun dla direziun raionala de Badia sön invit dl diretur Otto Moling. Al vëgn damanè almanco le medem numer de insegnanc de sostëgn co l’ann passè, i problems cun l’integraziun aumënta da ann a ann.

Usp – Nsci sciche ti ani passei possa i studënc nce chëst ann damandé n cuntribut per curì la spëises de viac. La cundizion ie la iscrizion per chëst ann pra na università o pra na scola speziela ora dl Südtirol, tla Talia o te paejes de rujeneda tudëscia. La proscima scadënza ie l 30 de auril 2004, l’ultima puscibltà de fé dumanda toma ai 31 de agost 2004.

USP - En mercui, ai 31 de merz, dales 11.00 danmisdé, tla curt interna dl Palais Widmann a Balsan, premiarà l’Assessur ala cultura ladina, Florian Mussner l’artista Barbara Tavella da La Val, davagnadëssa dl pröm concurs por artistes y artisc jogn dles valades ladines „Premia flus d’aisciöda“ scrit fora Assessorat ala scora y cultura ladina.

Usp - L Museum ladin Ciastel de Tor se presënta nce chëst ann cun n gran program de ativitieis. Una dl’atrazions plu nteressantes ie la prima edizion dla mostra culturela „Trienale Ladina“. L diretëur dl museum Stefan Planker y l presidënt Heinrich Huber à presentà la nuviteies a Bulsan.

Usp – Per rujené sun l daunì dla scola ladina se à l assessëur Florian Mussner da permò ancuntà cun i diretëures dla scoles ladines a Al Plan. N ie stai duc a una che la scola ladina avrà bon daunì.