Atualità

OSP – “I messun recordè, tignì i edli daverc y agì cun cosciënza y responsabilité, por che de te’ tragedies ne sozedes nia ciamò n iade”, à sotligné i trëi assessurs ala scora Otto Saurer, Luisa Gnecchi y Florian Mussner en gaujiun dl 60ejim aniversar dla liberaziun dl ciamp de conzentramënt de Auschwitz che toma doman, ai 27 de jenà 2005. En chësc dé vëgnel recordè les vitimes dl nazism.

USP - Tles prömes trëi tlasses dles scores elementares ladines déssel gnì injuntè ales 26 ores d’oblianza al’edema atuales trëi ores de materies a lîta. Tla cuarta y cuinta tlassa dla scora elementara dess les scolares y i scolars avëi 27 ores d’oblianza al’edema y trëi ores de materies a lîta. Tles scores mesanes ladines déssel indöt gnì pité 32 ores d’insegnamënt de 60 menüc; chësc corespogn a 35 unitês da 50 menüc da sëgn y trëi unitês de materies a lîta. La Junta provinziala à aprovè incö, lönesc, sön domanda dl Assessur ladin Florian Mussner chëstes normes diretives por realisé la reforma dla scora .

USP – Sëgn sa les scolares y i scolars de cuinta tlassa dla scora alta co s’arjigné ca plü avisa ai ejams de maturité. Adöm al Ministêr dl’istruziun à l’Intendënza Ladina fat fora les materies che sarà oget dla secunda proa scrita pro i ejams de maturité dl ann de scora 2004/2005.

USP - La direziun dla scolina “Ladinia” lascia al savëi che le referat dl professur Wassilios Fthenakis sön le program por i 20 de jenà 2005 a S. Cristina vëgn spostè ai 17 de merz 2005.

USP - Les repartiziuns ala cultura dla Provinzia lascia alsavëi che la scomenciadia „Kulturpass“ va inant ince tl ann 2005. En chësc iade ne mëssel nia plü gnì fat na domanda aposta por ciafè le „Kulturpass“ nü. Chësc ti gnarà menè tl mëis de merz 2005 a vigni uniun che à le dërt de l’avëi. Al vel dal 1 d’aurì 2005 inant, por dui agn alalungia. Le „Kulturpass“ atual vel ciamò cina ai 31 de merz 2005.

USP - Propi por le tëmp da carlascè mët a jì le Museum Ladin Ciastel de Tor a San Martin na mostra dal titul “Dal Carlascè ala vita” che gnarà tignida daverta dal 20 de jenà 2005 inant. Da odëi saràl les mascheres dl artist Rinaldo Cigolla y d’atri sü laûrs.

L’Intendënza ladina lascia al savëi che les iscriziuns por les scores é indô davertes: l’ultimo terminn por se scrì ite ala scora elementara é ai 31 de jenà 2005, por la scora mesana ai 28 de forà 2005 y por les scores altes ai 31 de merz 2005.

Co se svilupëia pa i pici mituns, co ési pa bogn da imparè y ciünes é pa les metodes educatives plü adatades? De chëstes chestiuns rajonarà le professur Wassilios Fthenakis dl’Université da Porsenù tles incuntades sön la pedagogia por l’infanzia che gnarà tignides ai 13 de jenà a San Martin de Tor y ai 20 de jenà a S. Cristina. I referac vëgn organisà dala direziun dla scolina “Ladinia”.

USP - L’Assessur ladin Florian Mussner recorda che les domandes por n contribut provinzial por ativitês y investiziuns culturales, por artistes y artisc, y por l’ativitè de formaziun en general, mëss gnì dades jö anter i 31 de jenà 2005.

USP - Le Museum Ladin Ciastel de Tor a San Martin sarà davert dai 12 de jenà 2005, vigni mercui, jöbia y vëndres domisdé.