Atualità

La presentaziun dl dëssegn de lege sön l’istruziun da pert di trëi assessurs por la scora incö a Balsan é n vare important tla direziun de na regolamentaziun nöia tl setur dl’istruziun. La Junta provinziala â aprovè n mertesc la proposta de lege portada dant dai assessur Achammer, Mussner y Tommasini y che gnarà menada inant insciö al Consëi provinzial.

Le dessëgn de lege sön l’istruziun é gnü aprovè incö (09/12) dala Junta provinziala. Le proscim vare é l’ejaminaziun y l’aprovaziun da pert dl Consëi provinzial. Denant él i assessurs por l’istruziun Florian Mussner, Philipp Achammer y Christian Tommasini che tignarà na conferënza stampa de presentaziun dl dessëgn de lege, en jöbia ai 11 de dezëmber ales 09.00 a Balsan.

Crië ponc d’ancunteda tres l’imaja, l test y la mujiga cun na forma spirituela che porta a esprescion dumandes sun l’esistënza umana: la biblioteca provinziala mët da jì na sëira dedicheda ala vita y al’opera de Hugo Vallazza en juebia ai 11 de dezëmber dala 20. La manifestazion alda pro la lingia de referac “Per ejëmpl la Ladinia".

Scolars y scolares che frecuentëia na scora alta o n curs a tëmp plëgn de formaziun profescionala fora dl Südtirol po fà domanda ćina ai 18 de dezëmber por stipendiums y retüdes dles tasses scolastiches por l’ann scolastich 2014/15.

L’alfabetisaziun tla scolina tres le svilup dla cosciënza di sonns, l’insegnamënt dla storia y dla cultura ladina, l’educaziun musicala y plurilinguala: Chisc é ma n valgügn di temesc dles publicaziuns nöies che é gnüdes laorades fora chësc ann dal Departimënt Educaziun y Cultura Ladina tres le Ćiamp Inovaziun y Consulënza (ex IPL) y che vëgn anuzades dales scores sciöche material didatich nü.

Da incö 4 de dezëmber inant é la iesta nöia dla biblioteca provinziala Teßmann online. Le layout dla presënza internet nöia é gnü atualisé cun na forma saurida da odëi cun al zënter i contignüs plü importanć sciöche la chirida tl catalogh, l’aministraziun dl cunt d’imprëst, proieć, vijites y na suravijiun dles manifestaziuns plü atuales. Les informaziuns y i sorvisc é da ciafè te cater lingać.

N moscedoz de lingac desvalis, n stè dlungia y deboriada, ladin, todësch, talian y inglesc sarà da d’aldì y odëi dai 11 ai 13 de dezëmber dl 2014 a S. Martin de Tor: La Repartiziun Cultura y Intendënza ladina y la Repartiziun Cultura todëscia organisëia adöm cun la ćiasa edituria Folio n workshop, olache ara nen va de leteratöra ladina y süa traduziun te lingac desvalis.

Colié la fantasia y la pratica cun l’aprofondimënt de n tema d’atualité: Chësta é stada la sfidada dl proiet „Politische Bildung“ che é gnü organisè dal’Intendënza todëscia adöm a chëra ladina, por tlasses dles scores mesanes, altes y profescionales. Le concurs scolastich é rovè incö (27/11) tla fasa finala cun la presentaziun y valutaziun di 8 mius proieć a Balsan.

Le portal internet www.manif.it cöi adöm y presentëia te na manira scëmpla plü sorts de manifestaziuns, dal ćiamp dla cultura, ala musiga y formaziun, che vëgn metüdes da jì tles valades ladines dl Südtirol: incö, jöbia ai 27 de novëmber él gnü presentè le conzet nü dl portal che vëgn sostignì dales Repartiziuns dla cultura todëscia y ladina.

La Biblioteca Provinziala Dr. Friedrich Teßmann inviëia ala presentaziun dl liber de Hubert Stuppner „Oswald von Wolkenstein: Liebe, List und Leidenschaft“. La vita dl poet y dl componist dl tëmp terdmedieval y sües creaziuns musicales y artistiches é al zënter dla publicaziun nöia che vëgn presentada ai 4 de dezëmber dales 20 Biblioteca Provinziala Dr. Friedrich Teßmann a Balsan.