Atualità

128 museums, coleziuns y posć d’esposiziun vëgn presentà te na brosciüra nöia, ajornada y che vëgn dada fora dala Repartiziun Museums. Tla publicaziun nöia pon ciafè dötes les informaziuns ütles sön orars de daurida, numers de telefon, misciuns email, adresses y de cörtes descriziuns sön i museums. La brosciüra nöia gnarà tosc partida fora debann ti museums y ti ofizi por le turism.

Na scora alta cun n orientamënt europeich: chësta é la proposta dla scora tlassica „Beda Weber“ de Maran che é gnüda portada dant incö (mertesc, ai 29 de messè) dal assessur por la scora todëscia Philipp Achammer. La Junta provinziala à garantì so sostëgn al proiet.

Le conduziun de proieć, mesi de comunicaziuns moderns y la cronica de n’uniun: Por düć chi che é a će de n’uniun y che foss interessà da la condüje te na manira ćiamò plü profescionala ti vëgnel pité n curs de perfezionamënt, organisé dal Ofize Chestiuns de cabinet y dal’organisaziun dles Universitês popolares dl Südtirol. Le curs mët man ai 26 de setëmber, le lingaz d’insegnamënt é le todësch.

La sconanza di bëgns culturai é stada la tematica zentrala tratan l’incuntada danter l’assessur provinzial competënt Florian Mussner y Waltraud Kofler Engl, nominada da püch dala Junta provinziala sciöche direturia nöia dla Repartiziun Bëgns Culturai.

La Facoltè de Sciënzes dla Formaziun dla Université Lëdia de Balsan, cun sënta a Porsenù, ofrësc en colaboraziun cun les repartiziuns todësces, talianes y ladines dl’istruziun y dla formaziun dla Provinzia n curs de formaziun profescionala por l’insegnamënt dl lingaz inglesc tla scora primara dl Südtirol. Les domandes po gnì presentades ćina ai 19 de agost dl 2014.

Le zënter de documentaziun sot al monumënt dla vittoria é gnü daurì incö (ai 21 de messè) a Balsan. „Cun chësta daurida devënta le monumënt dla vittoria azessibl por düć, y vëgn insciö delibré da so pëis ideologich“, à splighé incö le Presidënt dla Junta, Arno Kompatscher, che à ajuntè, che le monumënt vëgn inserì cun chësc at te n contest storich, le proscimo vare sarà spo la normalisaziun.

Les costelaziuns y sües posiziuns tl firmamënt: chësta é la tematica de na mostra che vëgn daurida en sabeda, ai 19 de messè, tl Planetarium Südtirol tla Val d’Ega. La storia y les conëscenzes astrologiches sön le monn mitologich dles stëres po gnì vijité debann ćina ai 24 de agost.

Da en lönesc, ai 21 de lugio, ćina en sabeda, ai 2 d’agost, romagn la biblioteca provinziala dla “Teßmann” stlüta porvia de laûrs interns. Defora de chëstes does edemes romagn la biblioteca tres daverta d’isté dales 09.00 ales 19.00, les sabedes de lugio y agost indere tres dales 09.00 ales 12.30.

I posć de rodul y i cuntrać a termo al personal insegnant vëgn assegnà ai 7 de agost tl’Intendënza ladina a Balsan. I posć tles scores de musiga todësces y ladines vëgn indere assegnà ai 6 de agost tla Repartiziun Personal (Palaz Provinzial 8).

Incö vëndres, ai 11 de messè à presentè l’assessur por la scora ladina Florian Mussner y l‘intendënt por la scora ladina Roland Verra tratan na conferënza stampa a Balsan i resultać dl ann scolastich 2013-14 tles scores ladines. La conferënza stampa de presentaziun é gnüda tignida adöm cun l’assessur por la scora todëscia Philipp Achammer y l’assessur por la scora taliana Christian Tommasini.