Atualità

Le fin dl conzet “Garanzia por la jonëza” é chël da podëi ti pité a porsones sot ai 25 agn n post de laûr o n post de formaziun. La descriziun dles mosöres preodüdes dala “Garanzia por la jonëza” tl Südtirol gnarà presentada dal’assessuria Martha Stocker y dal assessur Philipp Achammer en jöbia, ai 10 de messè a Balsan.

Indöt 35,2 miliuns de euro mët la provinzia a desposiziun por stipendiums por la scora d’oblianza, por libri scolastics, la mensa scolastica y por le transport scolastich. Chësta dezijiun é gnüda tuta incö, mertesc al 1. de messè, dala Junta provinziala. Implü é inće gnüda aprovada la proposta dl assessur Achammer por l’ecuiparaziun di diploms de maester artejan danter le Südtirol y l’Austria.

“Incö dales cater domisdé pëia ia ofizialmënter le portal internet dla Euregio che é dediché ala pröma vera mondiala”: chësc à dit incö (al 1. de messé) le Presidënt dla Junta Arno Kompatscher do la sentada dla junta. L’ativaziun dla plata internet nöia, che gnarà ajornada te dui, proscimamënter trëi lingać, é n proiet por aumentè la cosciënza dla popolaziun sön chësta tematica

I scefs de govern Matteo Renzi y Werner Faymann à confermè trami dui la presënza por le convëgn “Regiuns tl’Europa – Europa dles Regiuns” a Ćiastel Prösels a Fié sön le program por la proscima sabeda, ai 5 de messé. Chësc à dit le Presidënt Arno Kompatscher, tratan la conferënza stampa do la sentada dla junta. Le convëgn mët bele man en vëndres (04.07) cun la pert scientifica.

En sabeda, ai 5 de messè, s’incuntarà le presidënt dla Provinzia Arno Kompatscher cun i scefs de govern Matteo Renzi y Werner Faymann, sön Ćiastel Prösels a Fié por jì do ala discusciun sön le significat atual dles regiuns tl’Europa. Dedô él preodü na vijita al cantier dl tunel de basa dl Prener – BBT a Mauls (Mules). Düć i media che ô to pert é perià da se acredité ćina en jöbia, 3 de messè.

Le raport dl’oferta formativa dles scores profescionales cun l’economia y le marćé dl laûr, les poscibilitês por na promoziun individuala tres i zëntri de formaziun y la formaziun di lerneri: chëstes é stades les tematiches tratades da püch tratan na incuntada danter l’assessur por la formaziun Philipp Achammer y i rapresentanć di zëntri dla formaziun profescionala.

Inier (24 de jügn) à na comisciun de storics che laôra dal 2011 incà por porvè da identifiché les porsones sopolides tratan l’epoca dl nazism tla tlinica psichiatrica de Hall tl Tirol, presenté süa relaziun finala. “Danter les 228 porsones sopolides nen él 46 che vëgn dal Südtirol”, dij la direturia dl Archif provinzial Christine Roilo, che fej pert dla comisciun di storics.

La junta provinziala à aprovè incö (mertesc ai 24 de jügn) indöt 13 miliuns de euro por finanzié i stipendiums por studënć por le proscimo ann academich. L’ultimo dé por presentè les domandes por n stipendium é ai 31 de otober.

USP - "Nix lesen, nix schreiben, nix gut" – chësc é le titul dl liber nü apëna gnü fora y che é dediché ala alfabetisaziun di migranć. Le liber cunta l’alfabetisaziun nia ma sciöche prozès linguistich y didatich mo inće sciöche poscibilité por tó pert ala vita soziala.

USP - Da püch à na rapresentaziun dla mendranza slava di sorbs vijité le Südtirol. Por podëi conësce plü daimprò la realté dles mendranzes tl Südtirol él gnü organisé danter l’ater inće na vijita al Museum Ladin “Ćiastel de Tor” a San Martin y ala galaria d’ert “Unika” a Urtijëi.