Atualità

N statut nü, n consëi dla fondaziun smendrì, na presidënza renforzada cun la orentè da orëi dialoghè y se confrontè: insciö dess le „Museum por l’ert moderna y contemporanea – Museion“ renforzè y amplié süa funziun culturala y soziala tl monn dla cultura y dl’ert tl Südtirol. L’assessur por la cultura Philipp Achammer à presentè incö ( 5 de forà) les novitês.

La Junta provinziala à nominé incö (03 de forà) les Consultes di Jogn nöies por i grups linguistics ladin, todësch y talian. Les Consultes di Jogn é n organ consultif dla Junta provinziala sön temesc che reverda i jogn. La dorada dl’inćiaria é de trëi agn. La pröma sentada dles Consultes gnarà tignida por le pröm iade deboriada, sciöche sëgn de na colaboraziun plü strënta, ai 26 de merz.

Antonio Lampis, Walter Angonese, Marion Piffer Damiani y Barbara Pizzinini: chisc é i mëmbri nüs dl Consëi dla Fondaziun Museion che é gnüs nominà incö (03/02) dala Junta provinziala. I obietifs, les prioritês y la funziun dla Fondaziun gnarà presentà te na conferënza stampa dal assessur Philipp Achammer en jöbia ai 5 de forà.

Le Miur (Ministero Istruzione Università e Ricerca) á publiché les materies dla secunda proa scrita dl ejam de stat 2014-15 y les materies che ti vëgn assegnades ai comissars esterns dla comisciun. Inće por les scores altes ladines él gnü publiché les materies dla secunda proa scrita.

Garantì les poscibilitês de formaziun adatades al sistem dla scora paritetica y mantignì l’atrativité dles scores altes ladines inće tl dagnì: Chisc dui obietifs é gnüs confermà da püch (27/01) dala Junta provinziala cun l’aprovaziun dl plan de destribuziun dl’oferta de istruziun y formaziun dles scores altes y direziuns tles valades ladines por i proscims cinch agn.

Proieć culturai y n concurs artistich en gaujiun dl centenà dla Pröma Vera Mondiala, la promoziun dla leteratöra ladina, le Dé dla Cultura Ladina y la lege nöia che reverda la promoziun dla cultura sarà cater dles tematiches zentrales dl Departimënt Educaziun y Cultura Ladina tl ćiamp cultural por l’ann 2015.

L Museum Ladin mët a jì en cunlaurazion cun l Servij ai Jogn dla Val Badia n workshop per jëuni danter i 14 y 20 ani per mparé a fé videospots y videoclips nce tres l’adurvanza de n drohne. L curs unirà fat dai 14 ai 20 de fauré dl 2015 y à n priesc simbolich de 10 Euro. Se nuté su possen pra l Sorvij ai Jogn dla Val Badia entro i 5 de fauré 2015.

La biblioteca provinziela "Dr. Friedrich Teßmann" a Bulsan urganisea n sada, ai 31 de jené na festa aldò dl moto “Cin valedes – cin sënsc” per la fin dla lingia de scumenciadives “Per ejëmpl la Ladinia”, cun chëles che l ie unit presentà de plu tematiches dl mond ladin. L program de festa mët man dala 10:30 y durerà nchin dala 20 da sëira cun mujiga, film, bal, letures y delicatësses culinaries.

Aumentè les competënzes linguistiches di scolars y sostignì le laûr di insegnanć: Na mapa cun 10 unitês didatiches por l’insegnamënt aladô dl’educaziun linguistica integrada é gnüda presentada incö (19/01) a San Martin de Tor: la material didatich nü fej pert de na seria de publicaziuns realisades por le sostëgn dla didatica linguistica integrada tles scolines y tles scores dles valades ladines.

L’aprovaziun dla lege che reverda le setur dl’istruziun y dl status iuridich dl personal didatich da pert dl Consëi provinzial porta para, insciö l’assessur Florian Mussner y l’intendënt Roland Verra, plü vantaji inće por la scora paritetica ladina tres l’azetaziun dles ativitês extrascolastiches, la regolamentaziun sön l’assunziun dl personal didatich y la garanzia de continuité tla didatica.