Atualità

USP – Tla sënta dla Repartizion provinziela per la Scola y Cultura ladina a Bulsan unirà duman merdi, 16 dezëmber, giaurì la mostra di sculeies dla Scola d’Ert de Urtijëi dedicheda a Leonardo da Vinci.

USP – La Provinzia de Bulsan dà ora uni ann da 100 nchin a 150 cuntribuc per curé la cultura ladina. Aldo dla lege muessel nce unì fat cuntroi sce la lies, grupes y istituzions à adurvà i scioldi sciche detlarà. Plu avisa uniral cialà do l 6 % di cuntribuc paiei ora ti ani 2007 y 2008, chisc unirà trai ora a cajo ai 17 de dezëmber 2008.

USP – A Urtijëi se à ncuei ancuntà duta la educadësses dla scolines ladines dla Provinzia de Bulsan per n di de urientamënt y barat. Danmesdì iel unì purtà dant la fundamënta di urientamënc per la scolines y domesdì à la educadësses prejentà l material didatich laurà ora nstës te la singula scolines.

USP – La Cunsulta culturela ladina se à ncuei (10 dezëmber) ancuntà a Bulsan per to tres l’ultima dumandes de cuntribuc per l ann 2008. Te si ultima senteda à la cunsulta mo cialà de reviers co che ie unì sustenì la cultura ladina ntan chësc ann. Cun la legislatura nueva dl’Aministrazion provinziela uniral nce metù su na Cunsulta culturela nueva. De ndut iel tres l Assessorat provinziel ladin unì dat ora cuntribuc per 1.200.000 Euro.

La mostra dedicada a Leonardo da Vinci cun laûrs di scolars dla scora d’ert Cademia de Urtijëi sarà da odëi tla ciasa dla scora y cultura ladina a Balsan tratan i mëisc de dezëmber 2008 y jenà 2009. Hommage n mertesc 16 dezëmber dales cinch domisdé.

USP – I artisc’ dla valedes ladines giapa na sburdla de mutivazion per jì inant su si streda artistica. La Repartizion ala Cultura ladina dla Provinzia de Bulsan à scrit ora n cuncors per duc i artisc’ ladins cun n pest de 15.000 Euro. “Chëst iede nvions nce i artisc’ dla valedes ladines tl’autra doi provinzies” spiega l assessëur provinziel Florian Mussner.

USP – Cun na publicazion nueva de materiai per la scoles uelen cuntribuì a ti dé na majera denità culturela ala lijëndes ladines. La Ntendënza per la Scoles Ladines dla Provinzia de Bulsan, deberieda cun la Lia culturela Fanes y la Cumunanza Ladina a Bulsan à prejentà n liber nuef dal titul “Lijëndes y cianties” che unirà spartì tla scoles de Gherdëina y Badia.

USP – La nueva cunsulta provinziela ladina di jëuni à nsëira (27 nuvëmber) lità Patrick Stuflesser a presidënt. L assessëur provinziel ladin Florian Mussner deberieda cun Klaus Notdurfter y Wilma Runggaldier dl Ufize di jëuni, à laudà la ueia de fé di undesc cumëmbri. Cun la senteda costituënta tl Kassianeum a Persenon iel bel unì fat n prim var de bona culaburazion a bën dla junëza tla valedes ladines.

USP - L Ntendënza per la Scoles Ladines, deberieda cun la Lia Culturela Fanes y la Consulta Ladina a Bulsan prejenta na publicazion nueva de materiai per la scoles dal titul “Lijëndes y cianties”.

USP – Pra la premiazion dl cuncors de leteratura „Auturs ladins scrì...“, n sada sëira a Urtijëi, iel nce unì prejentà l liber di pec che à venciù l cuncors. Iaco Rigo y Ivan Senoner à pudù pië do dala mans dl assessëur provinziel Florian Mussner l prim pest y truepa laudes. Na bela cumpëida de publich à mustrà gran nteres per l’opres nueves scrites tla rujeneda ladina.