Atualità

USP – Te si prima senteda à Cunsulta ladina nueva ncuei domesdì (prim auril) udù dant manieres per smendrì la burocrazia ala lies cultureles tla valedes Ladines. “Chëi che se dà ju per la cultura ladina y fej ulentariat ne possa nia mo unì ciariei cun truep lëur burocratich, sën ie unì l mumënt de fé zeche per smendrì burocrazia” à dit l assessëur provinziel ladin Florian Mussner.

USP – N juebia (2 auril) unirà na delegazion l’urganisazion "Pestalozzi - Fröbel" dal Deutschland y dala Franzia a vijité la scolines ladines cun trëi rujenedes. N se aspieta feter 30 persones danter educadëures de scolines y d’autra espertes y esperc de pedagogia infantila. Sun l program dl di iel na vijità ala scolina de Sëlva sciche ejëmpl per la 17 scolines ladines.

USP – Cater scoles autes à laurà cater ani tl proiet europeich d’ert “Women in art”. N juebia 2 de auril uniral giaurì na mostra de chësc proiet tl Zënter per ert y cultura a Urtijëi. Te “Women in art” se tratela dla maniera de esprescion creativa y d’ert dl’ëila.

USP – Ntan la prima ëures de ncuei lunesc (30 merz) ie sun la streda de Gherdëina danter Runcadic y Puntives unì ju sasc. Per garantì la segurëza à la streda messù unì sareda nchin da duman. I respunsabli dla Provinzia à danmesdì inò pudù giaurì l stradon de Gherdëina.

USP – L Istitut per furmazion musichela de rujeneda tudëscia y ladina, à da chëst ena n’aministrazion nueva de nuef persones. Te si senteda de n lunesc (23. merz) à la Jonta provinziela numinà da nuef i trëi revisores di conc.

USP – La prima tlas “A” dla Scola auta per l soziel a Persenon y na grupa dla Val Venuesta à venciù la segonda pert dl cuncors online “Syndrome09”. Danter chëi che ncuei (24 merz) pudù pië do l pest dal assessëura Sabina Kasslatter Mur a Persenon, iel nce sies sculees ladines.

USP – I sculeies de Sëlva ie ncuei (24 merz) sun Plan de Gralba per n di dedicà ala segurëza sun la nëif. Deberieda cun de plu lies y istituzions vëniel nsenià ai mëndri ciuni che ie i periculi dl sport sun la nëif y co che n possa i astilé ora. L assessëur Florian Mussner sorissea la mpurtanza de chësc di de nseniamënt che vën metù a jì per l prim iede.

USP – 180 sculeies da caranta scoles de rujeneda tudëscia, taliana y ladina à fat pea l cuncors de furmazion politica 2009. I prims de uni categuria puderà fé pea la finela a livel dl Tirol, ai prims de auril a Dispruch. Matthias Vinatzer ie terzo tla categuria per scoles de rujeneda ladina y taliana.

USP – La Repartizion ala Cultura ladina dla Provinzia de Bulsan à scrit ora n cuncors per duc i artisc’ ladins. Ncuei (18 merz) à la cumiscion abù si prima ancunteda per se anjenië ca. L cuncors per artisc’ ladins ie chëst ann nce unì giaurì a artisc’ dla valedes ladines dl’autra doi provinzies.

USP – I nsenianc dla scoles ladines ne à ncuei (mierculdi 18 merz) nia fat pea l scioper. I sindacac AGB-CGIL ova cherdà a n scioper a livel naziunel contra l guviern Berlusconi. Tla scoles tudësces ne iel nianca stat 5% di nsenianc che a fat pea l scioper.