Atualità

USP - Tla scoles y scolines ladines saral dal proscimo ann de scola 13 persones de plu. Per l prim iede saral nce tla scolines ladines l aiut de maestres per l’integrazion de mëndri cun dificulteies. L assessëur Florian Mussner vëij chësc sciche n gran var per na miëura furmazion di mëndri cun dificulteies, che sta dassënn a cuer.

USP – L cumité nuef de evaluazion dla scoles ladines se à (ncuei) juebia, 5 de juni ancuntà per la prima senteda y à lità si presidënt. A cë de chësta grupa ie unì lità Lois Ellecosta. L duvier per i proscimi cater ani ie chël de mëter dant i argumënc aldo de chëi che dëssa unì valutedes la scoles ladines. L’assessëur ala scola ladina, Florian Mussner vëij tl’evaluazion n aiut y na motivazion per tenì aut l livel de nosta scoles.

USP – Danter i premiei dl cuncors “Prima la Musica” a Dispruch, se à nce doi ensambles dla Scola de Mujiga de Gherdëina fat unëur. Dla valeda ladina iel unì premià trëi sculeies al flaut, un dal’armonica y cinch che sona la perscuscion.

USP – Chi che ulëssa fé do la matura possa se njenië ca cun l aiut dla scola da sëira. N mierculdi ai 4 de juni vëniel a Persenon tenì na sëira de nfurmazion sun la scola da sëira che fej l program dl istitut tecnich per l cumerz y la scola auta per l soziel. A Bulsan vëniel dat nfurmazion per la preparazion ala matura per geometri.

USP - Na delegazion dl Israel à ntan l ultimo fin dl’ena vijità l Museum Ladin a San Martin de Tor meneda dal assessëur ladin Florian Mussner.

USP - La Jonta provinziela de Bulsan à tla senteda de (ncuei) lunesc, 3 de juni fat ora de scrì ora n cuncors de ideies per na streda de zircunvalazion per Sëlva. Per i proscimi 10 ani ie l program dla zircunvalazions tl Südtirol bele fat, perchël saral rie ntegré sëuraprò mo la streda per Sëlva. Danter l’autra decijions dla jonta iel nce pruvedimënc per al forza de compra, paiamënc ai chemuns per l IRAP, cuntroi de cuntribuc da plu provinzies, y la fundazion dla Business Location Südtirol.

USP - L’impëgn de mantignì y restrotoré les viles dla Val Badia onorëia l’Assessorat Ladin dla Provinzia de Balsan cun le pest “na vila de valüta”. Le pest che é gnü scrit fora por le pröm iade é de 7.000 euro. “Les viles é de gran valur, porchël orunse onorè chi che ciara de ëres cun gran pasciun, insciö l’assessur Florian Mussner.

USP – N valgun dis te berstot, te butëiga o te ustaria possa per sculeies dla terza mesana no me vester na bela speriënza, ma nce n aiut a to na decijion per si daunì tl lëur. Tl Palais Widmann a Bulsan iel (ncuei) mierculdi 28 de mei, unì prejentà l proiet per sculeies dla mesana de vester lerneri per vel dis.

USP - Per l proscimo ann de scola se à scrit ite 360 sculeies tla scoles autes dla Val Badia y de Gherdëina. Permez al ann passà iel stat n aumënt de belau 4% cumpedan adum la iscrizions dla cater scoles. L assessëur ladin Florian Mussner manda n apel ala populazion de se nuzé dla scoles autes ladines che à giapà de bona valutazions.

USP - ladin Florian Mussner söl Ju de Frara le vizepresidënt dla Lia di Comuns ladins Paolo Frena, l’ombolt da Fodom Gianni Pezzei y l’assessuria da Cortina d’Ampëz Paola Valle por definì deboriada n proiet che lieia adöm i ladins dles cin valades incër le Sella che vir fora dles trëi provinzies. Invià ala sentada ê ince l’assessur regional Luigi Chiocchetti y le presidënt dla Lia di ombolc’ ladins Bruno Senoner che n’à nia podü tó pert.