Atualità

USP – I dis de educazion politica pieta 144 manifestazion per fé cunëscer l lëur dl’educazion politica y per mutivé duc i zitadins a na culaburazion ativa. L program che à bele metù man n juebia, ie unì prejentà ncuei (24 auril) a Bulsan.

USP – La cundizions acioche vëniel recunesciuda la figura prufesciunela de mediatëures culturei ie unides nviedes via n vënderdi (17 auril) tla cunferënza dla regions a Roma. “Chësc ie n var mpurtant de vies dl recunescimënt y nce n cont de valorisé chël che i mediatëures culturei fej per la ntegrazion tlo da nëus” dij l’assessëura provinziela Barbara Repetto.

USP – A Bulsan ie ncuei (15 auril) unì prejentà la mostra interregiunela dal titul Labirint:Lidëza che giaurirà ai 9 de mei tla furtificazion de Furtëza (Franzensfeste). L se trata de na mostra metuda a jì dai trëi assessorac ala cultura dla Provinzia de Bulsan n culaburazion cun l Land Tirol y la Provinzia de Trënt.

USP – I reperc archeologics che ie ultimamënter unic abinei tl raion de Ciastel y Sëuc sarà da udëi da duman, ai 16 nchin ai 26 de auril. La mostra particulera metuda a jì dal Ufize provinziel per bëns culturei sarà da udëi per diesc dies tla scola mesana “Leo Santifaller” a Ciastel. Ai 16 y 27 de auril uniral tenì doi cunferënzes.

USP - Per l ann de scola che vën se à tla scoles ladines scrit ite de plu sculeies permez al ann passà. Danter scolines, scoles de ublianza y scoles autes tla Val Badia y te Gherdëina, se à scrit ite 25 sculeies de plu. L pitl aumënt mostra su na situazion stabila tla doi valedes ladines. Per l ann de scola 2009/10 se à scrit ite de ndut 3.315 sculeies.

USP – La legrëza de cianté y de fé mujiga di sculeies dla scola elementera de S.Crestina ne n ie nia da fermé: te n proiet scolastich iel unì tëut su per l prim iede na CD cun cianties de cuntenut educatif y da plajëi, beles da scuté su per duta la familia. Pra la prejentazion ai 17 y 18 de auril a S.Crestina saral nce da udëi bai, n spetacul cun dia y nchinamei video clips. Cumpran la CD dal titul „Supermegafesta“ juden n proiet umaniter dla Caritas.

USP – Chisc dis ie jites online la plates internet nueves dla Repartizion provinziela per la Cultura y Intendënza ladina. Sota l’adres www.provinzia.bz.it/ntendenza-ladina vëniel prejentà te trëi rujenedes la istituzion cun servijes, proiec y cuntac da pert dla Provinzia de Bulsan per la Cultura y scola ladina. Tres l cialé ora y la partizion nueva vëniel dat truepa nfurmazions che unirà do y do atualisedes.

USP – L plann de nseniamënt, la valutazions y la uneranza per sunadëures jëuni ie stai argumënc prinzipei dl’ancunteda di respunsabli dla defrënta grupes dla Scoles de Mujiga de dut Tirol. L’ancunteda ie chëst ann unida tenida a Sterzing.

USP – Chisc dis vëniel spartì ora tla scoles y scolines ladines l cudejel nuef di cursc de furmazion per nsenianc, educadëures y diretëures. Cun na vela de passa 50 cursc de furmazion persunela y furmazion te duta la materies de scola, vëniel tenì cont di bujëns y dla problematiches atueles. L cudejel ie unì dat ora per l 20° ann ndolauter.

USP – Tla scolina “Surëdl” te Sëlva ie ncuei danmesdì (2 auril) unit adalerch na delegazion de esperc pedagogics per mparé a cunëscer miec la maniera de lauré tla scolines ladines cun trëi rujenedes deberieda. I pedagoghes dala Franzia y dal Deutschland à abù gran stima per l servisc che l ti vën pità ai mëndri dla valedes ladines.