Atualità

USP – “Tla scoles elementeres de Gherdëina vëniel scrit feter tan bën tudësch sciche a tla scoles tudësces. I sculeies dl’elementeres dla Val Badia scrij belau tan bën talian sciche tla scoles talianes.” Chësc ie l resultat generel dl’analisa scientifica sun la cumpetënza dla rujenedes di sculeies ladins che ie unida prejenteda ncuei (09 dezëmber) a Bulsan te na publicazion.

USP – La reforma dla scola auta y dl’università tla Talia y la situazion particulera tla provinzia de Bulsan ie argumënt dla cunferënza ai 11 de dezëmber n ucajion dla fiera Futurum. Reprejentanc dl’universiteies de Dispruch y de Bulsan menerà na descuscion cun respunsabli dl Minister per l’istruzion y dl Minister per l lëur.

USP – Tla scoles ladines ie unì fat n’evaluazion linguistica di sculeies dla cuinta tlasses elementeres. Deberieda cun esperc dl’Università de Bulsan iel unì analisà la nrescida y paredlà cun sculeies de rujeneda tudëscia y taliana. I resultac de chësta evaluazion scientifica ie unic publichei te n pitl liber che unirà prejentà n mierculdi ai 9 de dezëmber tla Ntendënza Ladina a Bulsan.

USP – Per l segondo iede vëniel a Bulsan metù a jì la gran fiera dla furmazion tla Provinzia de Bulsan. La fiera Futurum mostra dal 10 nchin ai 13 de dezëmber la gran vela de furmazion per i mëndri nchin ala jënt de tëmp de duta la trëi grupes de rujeneda. Ncuei (26 nuvëmber) iel unì prejentà Futurum te na cunferënza stampa.

USP – La Cunsulta provinziela ladina se à ancuntà n mierculdi 25 de nuvëmber per tò tres l’ultima pert dla dumandes de cuntribuc per la cultura ladina da chëst ann. De ndut vëniel tl 2009 tres l Assessorat provinziel ladin judà cun 1.359.458 Euro a lies, artic’ y istituzions che lëura y mantën la cultura ladina. Per l ann che vën an bele dat pro prioriteies nueves.

USP – Tl proscimo ann de scola, de autonn 2010 uniral tla Scola d’Ert Cademia a Urtijëi giaurì na sezion de mujiga. Ncuei 23 de nuvëmber à scumencià n’ena de pratica per sculeies dla scola mesana che finerà via n sada 28 de nuvëmber cun n di dla porta davierta per duc. N sada uniral fat de plu prejentazions dla cumposizion “art-fish-music”.

USP – Tla Galaria Prisma de Bulsan iel da udëi l’opres de artisc’ ladins che à fat pea l cuncors scrit ora dala Repartizion ala Cultura ladina dla Provinzia de Bulsan. N vënderdi sëira (20 nuvëmber) iel unì giaurì chësta mostra n ucajion dla premiazion de Philipp Messner y Giancarlo Lamonaca che à venciù l pest per artisc’ ladins.

USP – La Repartizion ala Cultura ladina dla Provinzia de Bulsan ova metù a jì n cuncors per artisc’ dla valedes ladines. N vënderdi ai 20 de nuvëmber sëuradajerà l assessëur provinziel ladin Mussner l pest provinziel per artisc’ ladins tla Galaria Prisma a Bulsan. Te chësta ucajion vëniel nce giaurì la mostra.

USP – La cunsultes provinzieles ai jëuni dla trëi grupes de rujeneda se anconta n iede al ann per na senteda cun duc deberieda per se baraté ora n cont de argumënc prinzipei dl’atività, manieres de lëur y fins da arjonjer. Da permò ie unì tenì chësta senteda a Persenon.

USP – Da moinla dëssel unì curà de plu i proiec che tol ite duta la grupes de rujeneda. Chësc ie unit ora n juebia (5 nuvëmber) dal’ancunteda danter i assessëures ai jëuni Mussner, Kasslatter Mur y Tommasini cun i presidënc dla trëi cunsultes ai jëuni Peer, Stuflesser y Lazzarini. Sciche argumënt dl ann ie unì cris ora l fé pea di jëuni tl ciamp dla furmazion.