Atualità

USP – Chi che ulëssa tl ann che vën jì a nsenië tla scola prufesciunela o te na scola de mujiga, possa nchin ala fin dl mëns se lascé mëter sun la graduatories. Chësc reverda nce la grupa de rujeneda ladina. L formular aldò ie publicà sun la plates provinzieles tl internet.

USP- L assessëur Florian Mussner se à inier (11 merz) ancuntà cun la presidënta nueva dla Union di Ladins de Fodom y l presidënt dl Istitut culturel ladin Cesa de Jan. Tl’ancunteda a Bulsan iel da tramedoi pertes unì detlarà de ulëi jì inant y nchinamei slargë ora la culaburazion culturela ladina.

USP – Chi che ulëssa mparé n mestier tl ciamp dla sanità possa n vënderdi che vën, 13 de merz se fé n cheder dla furmazion che vën piteda tla scola auta per la sanità Claudiana a Bulsan. La portes unirà tenides daviertes dala 9.30 nchin la 13.00.

USP - Tl ann de scola 2008/09 iel tla Provinzia de Bulsan 77 scoles autes, cun de ndut 19.396 mutans y mutons. 1.041 sculeies à chëst ann messé fé do na tlas; la perzentuela media ie de 5,4%, tla scoles ladines iela de 6,6%. De duc i sculeies se à 1,9% scrit ite te na scola auta paritetica ladina. La cumpëida de sculeies zënza zitadinanza taliana ie de 1.036, che fej ora 5,3 sun 100 scric ite. Tla scoles autes ladines iel 3,0% di sculeies nia de naziunalità taliana. Chësc vën fat al savëi dal Istitut provinziel de statistica Astat.

USP - Danter la Ladinia y la Rumantschia iel unì metù a jì n cuntat nuef, n fil culturel che dëssa tres internet judé a svilupé cuntac danter i doi raions dala medema ravises. La plata internet Filcultural.info prejënta la doi realteies, mostra paraleles y pieta ucajion de paredlé.

USP – Rosmarie Crazzolara da S.Ciascian ie unida numineda ispetëura nueva dla Scoles ladines. La nomina da pert dl ntendënt Roland Verra vëija dant chësta ncëria cun scumenciamënt de setëmber 2009.

USP – Nchin ai 31 de merz possa patrons y aministradëures de archifs privac y de dlieja damandé n cuntribut provinziel per l mantenimënt o l miuramënt. De cumpetënza ie l Archif provinziel.

USP – Tla scoles de mujiga de rujeneda ladina à scumencià la iscrizions per l ann de scola che vën. Aldò dl Istitut per l’educazion musichela puderan se scrì ite nchin la fin de merz.

USP – I presidënc dla cunsultes di studënc de duta la Talia se à i dis passei ancuntà a Roma. Danter chisc fovel nce Renè Pescoll per la grupa de rujeneda ladina che à fat pea n program rich de ancuntedes, rujenan danterauter nce cun l minister Mariastella Gelmini.

USP – L’edizion nueva dla revista dla scola ladina "Aules" ie dedicheda al argumënt "Contra radicalism y viulënza". Chësta plata che vën spartida ora a duc i nsenianc dla scoles y scolines ladines ie nce da giapé tla Ntendënza Ladina a Bulsan.