Atualità

Cun la reforma dl marcé dl laur (Jobs Act) dl govern Renzi mëss ince la Provinzia de Balsan se fistidié por atué n valgönes mudaziuns che reverda l’ordinamënt dl lernerat. Le dessëgn de lege é gnü aprové dala Junta provinziala: al é preodü na norma ad hoc por garantí l’ejam de maturité al intern dla formaziun duala.

Acumpanië y alesiré la ntegrazion tla scoles y scolines ladines cun cunsëies y nfurmazions d’utl: chësc ie l fin de doi brosciures nueves svilupedes dal Serivisc per la Consulënza psicopedagogica y per la ntegrazion dla Ntendënza ladina per i genitores cun n background de migrazion y per l personal didatich/pedagogich. La brosciures nueves unirà presentedes ai 07/03 a Al Plan y ai 09/03 a Urtijëi.

„La promoziun dl lingaz dla uma te n contest plurilingual é un di obietifs prinzipai de nosc sistem scolastich che vëgn renforzé y svilupé inant tresfora“, dij l’assessur por la scora ladina Florian Mussner en ocajiun dl De internazional dl lingaz dla uma che vëgn festejé ai 21 de forá.

Scora ladina: Les iscriziuns por l’inserimënt tles gradatöres d’istitut y tles gradatöres provinziales nöies por l’ann de scora 2016/17 mëss gní dades jö cina ai 17 de merz dl 2016 pro l’Intendënza ladina da Balsan.

La promoziun dl’ert ladina é le fin prinzipal dla mostra coletiva Trienala Ladina che gnará metüda a jí dal mëis de setëmber dl 2016 inant tl Museum Ladin Ćiastel de Tor. I artisć y les artistes che ó tó pert ala mostra pó dé jö süa candidatöra cina ai 8 de merz dl 2016. La bandida dl concurs é da püch gnüda publicada dal Museum Ladin.

Do le gran suzes cun 10.000 desćiariades bele fates por le sistem iOS de Apple pó sëgn "Storiesapp", l’app dada fora da Inovaziun y Consulënza por imparé i lingac te na manira plajora, ince gní desćiariada por android da GooglePlay. Le proiet didatich pita indöt set cunties interatives che favorësc l’insegnamënt plurilinguistich y pó gní anuzé por ladin, todësch, talian y inglesc.

La Junta provinziala á aprové incö le protocol d’acordanza danter les trëi Intendënzes scolastiches y l’ANPI (l’Assoziaziun nazionala di partejans) por amplié la conescënza di avenimënc storics tratan la perioda danter le 1919 y le 1948 tles scores. Al é preodü de plü scomenciadies.

La Junta provinziala á aprové incö (16/02) döes bandides de concurs por la conzesciun de stipendiums a studënc y studëntes che á stlüt jö l’ann 2014/15 cun resultac ezelënc: al vëgn metü a desposiziun indöt 164 stipendiums por studënc che á studié te n’université taliana y 162 por studënc che á frecuenté n’université foradecá. Vigni stipendium á na dotaziun de 1.160 euro.

L aniverser di 100 ani dala costruzion dla ferata de Gherdëina sarà chëst ann una dla tematiches dla Repartizion Cultura y Ntendënza Ladina. "L focus sarà sun la storia dla ferata cun nce n’udleda sun l daunì", nsci l assessëur Florian Mussner. Ai 23 de fauré uniral zelebrà na mëssa adum cun n pope dla dlieja russa-ortodossa per lecurdé la vitimes russes y duc i lauranc che à realisà la ferata.

La promoziun di lingac de mendranza te contesć de plurilinguism é un di obietifs primars dla rëi d’archirida “Mercator”, la organisaziun dles scores de mendranza por cunt dl’Uniun Europeica. La plataforma europeica presentëia da püch sön süa plata internet l’intendënt Roland Verra sciöche espert dl mëis de forá y fej ince referimënt a süa publicaziun “The Ladin language in education in Italy".