Atualità

USP - Per sustenì l cianté te scola fovel bele dan man n liber cun cianties per talian. Śën iel unì tëut su na CD per l nseniamënt tla scolines y tla scoles elementeres. L proiet nuef dl Servisc Inuvazion y Cunsulënza per la scoles ladines unirà prejentà ai 20 de merz te Sëlva.

USP – Nteressei a nsenië tla scoles ladines possa nchin lunesc ai 11 de merz mo fé dumanda per unì tëuc su tla graduatories provinzieles. La dumandes possa unì dates ju nce de persona tla Ntendënza Ladina a Bulsan.

USP – Sculeies y genitores che muessa chëst ann mo crì ora na scola auta per l autonn, giapa ai 14 de merz la puscibltà de vijité l Istitut tecnich economich Raetia de Urtijëi. Danmesdì uniral pità vijites menedes, domesdì puderan mparé a cunëscer la lezions y da sëira ie i genitores nviei a na prejentazion di programs.

USP – Chi che ulëssa ntan l proscimo ann de scola, 2013/14 mparé a suné n strumënt o fé lezions de cianté, possa ntan l mëns de merz se scrì ite ala scoles de mujiga. La iscrizions tla scoles de mujiga de Gherdëina y dla Val Badia vën tëutes su (da NCUEI, 4 de merz) nchin ai 28 de merz.

USP – Sun la plata web www.provinzia.bz.it/ferien iel da abiné de plu prupostes aldò de chëles che mutons y mutans, jëuni y jëunes y families dl Südtirol possa se mëter a jì l instà. L Ufize provinziel per jëuni à metù a jì chësta plata web per pité n grum de nfurmazions y prupostes sun: tëmp liede, ucajions per lauré, viagë y mparé d’instà.

USP - La biblioteca provinziela Friedrich Teßmann nviëia ai 7 de merz 2013 a n referat dl scritëur y tradutëur Peter Waterhouse. L argumënt dl referat ie „Im Wortgarten der Sprache“ – tl verzon de paroles dla rujeneda. L ie la segonda manifestazion tl cheder dla lingia de referac da chëst ann che va sota l moto „Texturen“ o „materiai tiejei“.

USP – L assessëur ladin Florian Mussner y respunsabli dl Istitut culturel Ladin de Fedom, Luca Agostini y Moreno Kerer se à (NCUEI) ai 22 de fauré ancuntà a Bulsan per miuré i cuntac danter Fedom y Bulsan, ma nce per traté formes de sustëni y culaburazion.

USP – La Cunsulta culturela ladina à (INIER) ai 21 de fauré tratà 111 dumandes de sustëni provinziel per la Cultura Ladina, dajan l bënsté a cuntribuc provinziei per na soma de 346.600 euro. L assessëur ladin Florian Mussner recunësc te chësta gran cumpëida de dumandes na gran atività culturela da pert dla lies tla valedes ladines.

USP - Da pert dl UNESCO ie l 21 de fauré unì numinà “Di nternaziunel dla rujeneda dl’oma”. Per chësta ucajion nvieia l assessëur provinziel ladin Florian Mussner de tenì cont de nosta rujeneda dl’oma te duc i ciamps dla vita da uni di: “Nosta rujeneda dl cuer ie n sëni de identità, che dasson nce mustré. Plu che l adurvon y plu saurì che se fajon nce a rujené nosta rujeneda te cuestions plu modernes”.

USP - L’atività y la ndesfidedes dl Istitut Ladin Micurà de Rü ie (INIER) ai 19 de fauré stat tl zënter de n’ancunteda cun l presidënt dla Provinzia Luis Durnwalder y l assessëur ladin Florian Mussner. L ie stat l prim iede che i espunënc dla Jonta provinziela ie jic tl Istitut ladin a San Martin per n cunfront sun l’atività dl Istitut culturel ladin y si funzion per la rujeneda ladina.