Atualità

USP - La cumiscion per lauré ora la lege provinziela nueva sun la Reforma dla Scoles Autes y dla furmazion prufesciunela, metuda adum da reprejentanc dla Ntendënza Ladina, Taliana y Tudëscia y dla furmazion prufesciunela, sun ncëria di Assessëures ala Scola Mussner, Kasslatter Mur y Tommasini, se à ancuntà plu iedesc y ie a n bon pont per mëter dant per tëmp y ëura l documënt ai organns politics dla provinzia.

USP – Sun scumenciadiva dla trëi ntendënzes provinzieles se anconta (duman) ai 3 de merz nsenianc y culaburadëures pedagogics per n barat de esperienzes. La terza ancunteda per maestres y maestri dla trëi grupes de rujeneda vën tenì tla Ntendënza ala scola tudëscia a Bulsan y ie dedicà ala scolina ladina.

USP – Nchin ai 11 de merz à artisc’ dla valedes ladines mo dl’aurela per fé pea i cuncorsc scric ora dal Museum Ladin Ciastel de Tor. L pest dunà da Richard Agreiter ie scrit ora per scultëures tl Tirol storich cun la valedes ladines dla Dolomites. Ala Trienala Ladina tl Museum Ladin possa fé pea atisc’ ladins dla Dolomites, di Grijons y dl Friul.

USP - Cun la dificulteies dl mparé, n problem che reverda truep sculeies, se à ncuei (24 fauré) dat ju feter 350 nsenianc y respunsabli de scoles, psicologhes y educadëures. Pra la giaurida dl cunvëni metù a jì dala ntendënza tudëscia, à l assessëura Kasslatter Mur sorissà che la scoles autonomes à i mesuns per lauré sun chisc problems tres la ntegrazion.

USP – I presidënc dla cunsultes provinzieles di sculeies se à ancuntà a Roma per n barat cun cun coleghes d’autra regions. Lena Mulser de Urtijëi à reprejentà i sculeies ladins.

USP - L 20esim secul à tucà particularmënter i ladins, sibe la persones che nce la cumenanza. La prima viera mundiela à purtà batalies sun la dolomites, l fascism à spartì i ladins y la catastrofa dl’opzion à purtà melcuntentëza y desperazion. Ala jënt ladina ntan chësc secul iel dedicà n nuef film documenter. L Presidënt Durnwalder y l assessëur ladin Mussner nvieia ala premiera ai 4 de merz a Bulsan.

USP – Avisa 200 ani da canche Andreas Hofer fova unì stlupetà, iel ai 20 de fauré a Mantova unì finà via ufizialmënter l ann de cumemorazion. “On purvà a nterpreté la storia, a fé ancunté i populi y a dé plu forza ala culaburazion sëura i cunfins” à dit l Presidënt dla Provinzia de Bulsan Luis Durnwalder a Mantova.

USP – „L di nternaziunel dla rujeneda dl’oma, dumënia ai 21 de fauré pieta ucajion per fé na reflescion sun l valor y senificat dla rujeneda ladina per cialé inant pian via da nosta identità y cultura“ nsci l assessëur provinziel ladin Florian Mussner che tol posizion al di nternaziunel fajan referimënt ala valorisazion, l respet, la tradizion y la legrëza per la rujeneda ladina.

USP - La Cunsulta provinziela per la cultura ladina se à ancuntà per tò tres la prima pert dla dumandes de cuntribuc da chëst ann. Nce tl 2010 ti uniral dat priorità al’ativiteies cultureles permez ai nvestimënc. L ann passà oven scumencià a dé ora cuntribuc cun manco burocrazia, aldò dla bona esperienza uniral nce chëst ann jit inant sun chësta streda.

USP – Culaburadësses pedagogiches dla scolines ladines ie chisc dis tl lëur de stlù ju na furmazion de trëi ani per se adaté al cheder prufesciunel nuef. La cualificazion sëuraprò à aldò dla respunsables dla scolina ladina bele purtà fruc tl lëur da uni di cun la pitla mutans y i pitli mutons.