Atualità

USP - Per mparé a cunëscer miec la vita de cunzitadins nueves ie jëuni dla trëi grupes de rujeneda jic de viac. Tl cheder de n proiet interculturel di Ufizies provinziei ai jëuni dla trëi rujenedes, ie jëuni stai tl Albania y furnerà mo de juni tl Marocco.

USP – Dal Minister dl’istruzion a Roma à l assessëura Sabina Kasslatter Mur inier (19 mei) pià do l bënsté de pudëi scumencé cun la reforma dla scola auta permò tl ann de scola 2011/12. Tl’ancunteda cun reprejentanc dl Minister iel unì rujenà de co mëter n drova la matura dla scola prufesciunela, n miuramënt dla doi rujenedes tl’università y la furmazion per nsenianc.

USP - Tla scoles mesanes ladines ie unì fat n’evaluazion linguistica te chëla che l ie unì analisà la cumpetënza dla rujenedes di sculeies dla terza tlasses, la paredlan a sculeies de rujeneda tudëscia y taliana. I resultac laurei ora deberieda cun esperc dl’Università de Bulsan y de Milan unirà prejentei ai 27 de mei a Urtijëi y ai 3 de juni a San Martin de Tor.

USP – La Cunsulta culturela ladina à tëut tres dumandes de sustëni a proiec culturei tla valedes ladines. Te si segonda senteda de chëst ann à la cunsulta provinziela dat si bënsté per paië ora cuntribuc a 40 proiec.

USP – Elisabeth Baur de Urtijëi, Maria Kostner da Bula y Heinrich Videsott de Piculin ie i prims trëi tla graduatoria nueva per la stiera da diretëur tla scoles ladines. La Ntendënza ladina ova scrit ora n cuncors per trëi stieres da diretëur da sëurandé ti proscimi ani.

USP – Move it, muev, pea man – l inuem dl proiet ie nce program: Cun chësc slogan nvieia i assessorac ai jëuni di paejes dl’Elpes Arge Alp, sota la presidënza dla Provinzia de Bulsan, a n cuncors de ideies per jëuni. L argumënt dl cuncors ie l respet.

USP – Per la cura de bëns culturei à l’assessëura Sabina Kasslatter Mur pudù sëurandé 14 uneranzes. “A una iesen de curé y mantenì l ncësa, nia for nscila ne iela canche la se trata cie che dëssa unì curà y a cë maniera, perchël iel mpurtant uneré l lëur che ie unì fat y a cësta maniera fé al savëi l valor dla cura de bëns culturei” à dit l assessëura. Danter i unerei iel nce la familia Taibon de Mareo.

USP – Tla 12 pluanies dla val Badia iel truep documënc storics che testemunieia la vita soziela ti ultimi centeneies. “L ie debujën de lauré su chisc documënc, i cataloghisé y i mëter a desposizion per studi. Son tl lëur de nvië via n proiet per salvé chësta testemunianzes storiches dla val Badia” spiega l assessëur Florian Mussner.

USP – Se dediché ai libri. Chësc ie chël che i trëi assessëures provinziei ala cultura mët a cuer a duc i zitadins, dantaprima ai jëuni, n ucajion dl di nternaziunela dl liber, de (duman) 23 auril. I libri ie nce de mpurtanza tl mond di media nueves, per dé inant savëi, speriënzes, cultura y rujeneda, à detlarà i assessëures.

USP – La Jonta provinziela à dat pro l program 2010 per sustenì l lëur per y cun la junanza tla valedes ladines. Sun pruposta dl assessëur ladin Florian Mussner iel unì dat pro de sustenì l’urganisazions che lëura per y cun jëuni y jëunes, y l’atività che l Ufize provinziel fej a bën dla junanza, nce ladina.