Atualità

USP – Les trëi ciantarines da La Val, cunesciudes sciche la grupa “Ganes” vif y lëura ti Paejes tudësc y tl’Austria. Per se tenì n cuntat cun la jënt de cësa y mparé a cunëscer d’autri ladins che ie oradecà fejeles pea l proiet dla plata internet „Ladins tl monn“. L assessëur provinziel Florian Mussner à n sëira (19 agost) ancuntà la “Ganes” pra si cunzert tl ciastel Trauttmansdorff a Maran.

USP – La families se nuzea ann per ann for de plu dla puscibltà de mandé la mutans y i mutons plu abenëura tla scolina. Na lege dl 2008 vëija danora la puscibltà de scrì ite i mëndri ala scolina bele cun 2,5 ani. Danter i scric ite per l ann de scola 2010/11 iel tla val Badia 26% de trëi ani y dessot, te Gherdëina iel 32% de chësta età. De cunseguënza devënta l’esigënzes de desferenzië l’ativiteies de scolina aldò dl’età for majeres.

USP – Cun la giaurida dla mostra de pitures de Lois Irsara tla sënta dl Istitut Ladin a San Martin saral da udëi la cuarta y ultima mostra artistica da chësc instà. La giaurida dla mostra persunela de Irsara per n vënderdi 20 de agost dala sies da sëira fej pert dla scumenciadiva cureda n culaburazion cun la lia “Ert por i Ladins”.

USP – La tradizion culturela dla lijëndes ladines dëssa giapé na majera lerch tl nseniamënt te scola. Cun materiai didatics nueves dai ora dala Ntendënza Ladina y dala Lia Culturela Fanes iel per l ann de scola nuef a desposizion na vela de materiai per mparé a cunëscer miec la lijëndes dl Rëni de Fanes.

USP – Ai 20 de agost uniral sëurandat la stieres da culaburadësses de ntegrazion tla scoles ladines. La nseniantes de ntegrazion che ie tla graduatories provinzieles per la scoles ladines possa se prejenté dala 9.30 tla Ntendënza Ladina a Bulsan.

USP – Tla scolines dla val Badia y de Gherdëina iel per l autonn unì tëut su 46 mëndri de plu permez a setëmber dal ann passà. Tla scolines ladines saral per la ann de scola 2010/11 de ndut 749 mutans y mutons. A duta la families che à damandà na luegia ti iel unì dat na puscibltà. I mutons y la mutans ruva for plu jëuni te scolina.

USP – La scoles de mujiga de rujeneda tudëscia y ladina se anjinia al proscimo ann de scola. Chisc dis iel unì sëurandat passa 120 stieres. Tla scoles ladines ie unì sëurandat n pue’passa mesa la stieres a desposizion.

USP – N vënderdi ai 6 de agost uniral tl Istitut Ladin Mirucrà de Rü giaurì na mostra de fotografies sun la Dolomites de Gustav Willeit. L se trata dla terza de ndut cater mostres artistiches ntan chësc instà metudes a jì n culaburazion cun la lia “Ert por i Ladins”. La giaurida ai 6 de agost a S. Martin de Tor scumëncia dala 6 da sëira.

USP - La suplënzes tla scoles ladines per l proscimo ann de scola unirà sëurandates n vënderdi ai 6 de agost, dala 9 danmesdì tla sënta dla Ntendënza, tla streda Binder a Bulsan.

USP – L Istitut Ladin Miucrà de Rü mënt chësc instà a jì cater mostres artistiches n culaburazion cun la lia “Ert por i Ladins”. Duman, 27 de lugio uniral giaurì a S. Martin de Tor la mostra de fotografies d’ert de Simon Perathoner. Te chësta ucajion uniral nce prejentà la zaita culturela-alternativa Puhin.