Atualità

USP – “La ntegrazion de sculeies cun dificulteies garata tres na culaburazion de de plu partner che se tën n cuntat”: cun chësc prinzip de lëur possa la grupa de lëur per ntegrazion scolastica cialé de reviers a 10 ani lëur fat n culaburazion. L prinzip de lëur ie chël de na coordinazion danter la istituzions per arjonjer na bona ntegrazion tla scolines y scoles de duta trëi grupes de rujeneda.

USP – Tl conservatorio “Claudio Monteverdi” a Bulsan uniral pità la furmazion cun minilaurea, tla spezialisazions de lied, oratorio y mujida da dlieja. Chësc à la Jonta provinziela à dat pro te si senteda (da ncuei) dl 28 de fauré.

USP - Opres letereres ti dà na majera richëza a na rujeneda. Cun chësc pensier sustën la Provinzia de Bulsan chëst ann inò autëures ladins cun n cuncors de leteratura. Per stories adatedes a jëuni y jëunes iel da vëncer de plu pesc’ per na soma de 6.000 euro. Autëures ladins possa nchin ala fin de mei 2011 mandé ite si pec tl Ufize provinziel per la Cultura Ladina.

USP – Per l’atività y gestion dl Istitut culturel ladin Micurà de Rü, à la Jonta provinziela dat pro n finanziamënt de 404.000 euro. Nce sce la situazion economica atuela sforza la man publica a scurté i custimënc iel sun pruposta dl assessëur Mussner stat mesun seguré al Istitut culturel feter l medemo budget sciche ti ani passei.

USP - La bibliotech provinziela "Dr. Friedrich Teßmann" unirà sareda n juebia grassa y n merdi de carnescià domesdì.

USP – I sculeies che finerà chëst ann la scoles mesanes de Gherdëina possa n juebia y vënderdi fé pea n di de esperienza tl istitut tecnich Raetia a Urtijëi. Mpede n di tlassich de porta davierta vëniel a chësta maniera prejentà la scola auta paritetica te na forma spezifica y adateda per i sculeies dla valeda.

USP – I calëndri de scola dëssa, da scola a scola, deventé plu valives. N vënderdi ai 18 de merz, l di do la festa naziunela ne dëssel nia unì juntà mo n di de feries y l program per l sport te scola ie stai argumënc tla senteda dla Jonta provinziela (ncuei) ai 21 de fauré.

USP – Te si prima senteda dl ann à la Cunsulta provinziela per la cultura ladina tëut tres de plu dumandes che ti ani passei. Feter duta la 111 dumandes ie unides azetedes y nsci puderal unì fat l decret dla pert dl assessëur provinziel ladin per paië ora i cuntribuc. Te chësta prima pert de dumandes azetedes se tratel de cuntribuc per na soma de 391.000 euro.

USP - Le lingaz dla uma é n valur che ne dess nia ma gnì sotrissé en ocajiun dl dé internazional che le recorda. Na pert de ci ch’i sun é lié al sonn y significat de chësc prüm lingaz ch’i un aldì da pici insö, che à formè nosc pinsier y dè parores a nüsc sentimënc”, scrî l’assessur Florian Mussner en ocajiun dl dé internazional dl lingaz dla uma ai 21 de forà.

USP – Tl 2019 ulëssa la Provinzia de Bulsan deventé l zënter dl nteres culturel de Europa. Deberieda cun i raions dl Nordest dla Talia se anjinien ala candidatura per deventé capitela europea dla cultura 2019. N juebia ai 24 de fauré uniral a Bulsan sotscrì la fundazion dl cumité de candidatura cun vel nota ladina.