Atualità

USP - La detlarazion de grupa de rujeneda n ucajion dla Cumpededa dla jënt ie de gran mpurtanza per defënder la mendranza ladina: chësc ie l pensier zentrel dl Di dla Cultura Ladina, (NCUEI) ai 30 de setëmber a Bulsan. L presidënt Durnwalder y l assessëur Mussner à nvià a na detlarazion senziera per avëi, tres l pruporz, na spartizion giusta di mesuns publics.

USP – N panorama dla situazion dla leteratura ladina y tl medemo mumënt material per l nseniamënt te scola pieta la Ntendënza dla Scoles Ladines cun n liber nuef. L liber „Ancuntedes“ de Roland Verra unirà prejentà ai 6 de utober n ucajion dl ArtDay tl zënter dla scoles autes a Urtijëi.

USP – I sculeies de duta la scoles autes ladines fajerà n juebia ai 06 de utober n di de workshops creatives- artistics. Chësc di dl’ert che vën tenì a livel naziunel y vën a Urtijëi metù a jì dala Ntendënza Ladina, ie chëst ann dedicà ala mpurtanza dla detlarazion de grupa de rujeneda pra la Cumpededa dla jënt.

USP – L’analisa di resultac dla proves PISA mostra su n gran miuramënt di sculeies ladins a fé conc. Paredlan i resultac 2009 cun chëi dl 2006 iel nce unì a lum n miuramënt tl liejer, ntënder tesc’ y scienzes natureles. I resultac dl sistem nternaziunel de valutazion dla capaziteies di sculeies ie nce per la Scola Ladina n strumënt de urientamënt per la programazion y l miuramënt dl nseniamënt.

USP – Tobia Moroder de Urtijëi à venciù l prim pest dl cuncors de leteratura ladina metù a jì dal Assessorat provinziel Ladin. Chëst iede vëniel partì ora de plu pesc’: l segondo pest ie jit a Ruth Videsott y tla categuria di jëuni iel mé unì dat ora n segondo pest che ie jit a Julia Runggaldier. L’opres letereres unirà publichedes y d’ansciuda prejentedes pra na premiazion.

USP - En sabeda al pröm d’otober saràl da aldì por le pröm iade le grup Ganes tla Val Badia. Les chertes por le conzert dales 8 da sëra tla Ciasa de Cultura a La Ila é bele dötes gnüdes venüdes. Chësc desmostra le gran suzès por la scomenciadia dl Istitut Ladin Micurà de Rü, che à orü ti dè l’ocajiun ala jënt ladina de aldì a Ciasa le trio badiot che à portè les Cianties ladines al publich foradecà.

USP – La fazion dla cumpededa dla jënt y dl pruporz che vën a se l dé dala detlarazion de grupa rujeneda ie i doi argumënc zentrei dl Di dla Cultura Ladina. L danmesdì per se dé jù cun chësta tematiches a unirà, n vënderdi ai 30 de setëmber, giaurì cun na ntroduzion dl presidënt dla Provinzia Durnwalder y dl assessëur ladin Mussner.

USP - L ann de scola nuef tla valedes ladines iel unì nvià via (NCUEI) ai 09 de setëmber tl’università a Persenon, cun dl Di dla Scola Ladina tl sëni dla mujiga. Te chësc di de furmazion y ancunteda iel unì jit plu sot al valor dla mujiga tl’educazion. L assessëur provinziel ala scola ladina à fat n apel a de plu culaburazion danter istituzions, scoles y families.

USP - La nuviteies dl ann de scola nuef y l valor dla mujiga tl’educazion sarà chëst ann i argumënc zentrei tl Di dla Scola Ladina ai 9 de setëmber tl’università a Persenon. Danora prejenterà presidënt dla Provinzia, l assessëur ladin y l ntendënt ladin la nuviteies aministratives. Dopro saral da audì n referat sun l valor dla mujiga tl’educazion.

USP – La furmazion y la scoles vën tla valedes ladines finanziedes dala Provinzia de Bulsan tres de plu canai: i nsenianc depënd dala cumpëida de iscrizions, la frabiches vën fates aldò dl bujën y l’atività vën finanzieda aldò de plu criteries. La basa de tratatives per finanziamenc y l pëis che la populazion ladina giapa depënd n majera pert dal pruporz. D’autonn unirà la proporzion dla trëi grupes de rujeneda cumpededa ora da nuef. I zitadins puderà se detlaré anonimamënter pra si grupa de rujeneda.