Atualità

USP – L Ministere per l’Istruzion a Roma à tl cheder dla scumenciadiva “Europa dl’Istruzion” scrit ora n pest Label 2012. La scoles dla provinzia che à fat esperienzes de partnerariat europeich possa tò pert al pest “L’Europa muda la scola”.

USP - Per l ann de scola che vën se à danter scoles autes y prufesciuneles ladines scrit ite 6% de plu sculeies permez al ann passà. L majer aumënt ie stat tla Scola prufesciunela y Lizeum d’ert a Urtijëi. Aldò dl svilup demografich iel tla scoles de ublianza stat manco iscrizions y nscì se la cumpëida generela de sculeies mantenì feter valiva. Per l ann de scola 2012/13 iel tla valedes ladines de ndut 3.267 scric ite.

USP – Per fé cunëscer l drë valor dla lijëndes ladines al mond culturel talian vëniel dat ora l liber “Miti ladini delle Dolomiti”. L Istitut Ladin Micurà de Rü, la prufessurëssa Ulrike Kindl y l assessëur provinziel Mussner à (NCUEI) ai 17 de auril prejentà l proiet editoriel te chël che l vën scrit da nuef la lijëndes ladines abinedes adum da Karl Felix Wolff. Cun chësc proiet se an tëut dant de fé valëi la mpurtanza storich-culturela dla lijëndes ladines y de les dé inant te n cuntest de valuta leterera. Dut chësc per dé inant l arpejon che l mond ladin ova bele dat inant canche l ne univa mo nia scrit.

USP - Cun l proscimo ann de scola uniral nce tla scola prufesciunela a Urtijëi nsenià do l model paritetich. A chësta maniera vëniel garantì l nseniamënt tla trëi rujenedes provinzieles, ladin, tudësch y talian cun sëuraprò nce l nglëisc.

USP – Cun la publicazion nueva “Miti ladini delle Dolomiti” vëniel nvià via n proiet editoriel per fé valëi la mpurtanza storich-culturela dla lijëndes ladines y per les dé inant a n majer publich te n cuntest de valuta leterera. L Istitut Ladin Micurà de Rü nvieia al prejentazion, n merdi 17 de auril, dala 09 danmesdì tl palaz Widmann a Bulsan, n prejënza dl assessëur provinziel Mussner.

USP - Danter borses de stude, rembursamënt de iscrizions, lueges da durmì y menses à la Jonta provinziela (NCUEI) ai 10 de auril dat pro finanziamënc per 22 milion de euro acioche la jënt posse chëst ann studië te na università. L fin prinzipel de chisc aiuc ie de premië chëi che arjonj de bon resultac y de judé a chëi che ne à nia nstës la despunibltà finanziera de jì al’università.

USP – Tl proscimo ann de scolina puderà 686 mutans y mutons di luesc ladins jì ala scolina. A chësta maniera ne iel per la 17 scolines dla Val Badia y de Gherdëina chëst iede deguna lista de aspitanza per giapé lerch. Aldò de na lege provinziela ne vëniel nia plu tëut su i plu pitli cun manco de 30 mënsc, sciche l fova unì fat te vel scolina te na fasa sperimentela.

USP - La Biblioteca provinziala Friedrich Teßmann inviëia ai 12 d’aurì dl 2012 a n referat dl storich Laurence Cole. Le titul dl referat é: „Nation und Identität in Tirol vor 1914“ (Naziun y identité tl Tirol dan le 1914). Do le referat gnaràl fat na mësa torona cun le referënt y storics dl Südtirol. Chësta manifestaziun stlüj jö la linia de referac „Südtirol in Europa. Eine Spurensuche“.

USP – Do la dezijion dla Jonta provinziela per l’ena de scola a 5 dis y deguna scola de sada, ova i cunsëies de scola da tò la dezijion sun la partizion dl’ëures. Te duta la scoles autes ladines à i cunsëies sën fat ora de sëurantò l’ena a 5 dis. L assessëur provinziel Florian Mussner laudà chësta dezijion tan mpurtanta per garantì la scoles tl daunì.

USP – I trëi intendënc dles scores dla Provinzia de Balsan s’à incuntè (INIER) ai 29 de merz tla sënta dl lizeo artistich y dla scora profescionala da Urtijëi por miorè le contat y laurè inant sön la bona colaboraziun danter les trëi Intendënzes.