Atualità

USP – Per nsenië tla scoles y scolines ladines muessa i nsenianc documenté si cumpetënza linguistica tla rujeneda ladina. Pra l ejam de ladin per nsenianc iel unì mudà la pert scrita che ne sarà nia plu na traduzion ma dumandes a resposta davierta.

USP – Trëi scric premiei dl cuncors de leteratura ladina scrit ora dal Assessorat ala Cultura Ladina plu mo autri trëi pec cris ora dala cumiscion ie unic stampei te n liber. La prejentazion dla stories per jëuni y jëunes, y la premiazion dl cuncors „Autëures Ladins Scrij...“ unirà tenida n vënderdi ai 25 de mei dala 6 da sëira tl local di jëuni Saut a Urtijëi.

USP – Te n mëns, ai 15 de juni uniral tla Furtëza de Franzensfeste giaurì la cuarta edizion dla mostra Panorama, la gran mostra che pieta na sëuravijion dl’ert atuela tl Südtirol. Ala scumenciadiva dla repartizions provinzieles ala cultura dla trëi grupes de rujeneda deberieda cun l Museion fej nce pea de plu artisc’ ladins. I assessëures provinziei ala cultura à (NCUEI) ai 16 de mei prejentà la gran scumenciadiva.

USP – La Jonta provinziela à dat pro la ndicazions provinzieles nueves aldò de chëles che i istituc tecnics economics dla valedes ladines possa anjenië i curricula per la terza, cuarta y cuinta tlas.

USP - La scolines ladines à laurà ora prinzips de urientamënt per l lëur che tol ite i pitli mutons y la mutans, ma nce genitores, respunsabli di chemuns y dl sistem de educazion dla Provinzia. N vënderdi ai 18 de mei vëniel a La Ila prejentà i prinzipies de chësc model de urientamënt n muvimënt. I culaburadëures di media ie nviei dala trëi domesdì.

USP – Ultimamënter à sculeies for inò abù dificulteies de mparé y de mëter a verda ntan scola. A chësc fenomenn de nosta cumenanza à l Departimënt provinziel Educazion Ladina dedicà na furmazion spezifica. Ai 11 de mei (DUMAN) vëniel tenì l’ultima ancunteda da chëst ann per furmé persones de referimënt per chësta problematiches.

USP – I servijes che la Provinzia de Bulsan pieta spezificamënter per la populazion ladina lëura te na situazion particulera: permez ai medemi servijes per l’autra grupes de rujeneda vëniel laurà cun manco culaburadëures y plu cumpetënzes per uni un. Te tëmps de gran mudazions iel per chisc servijes mpurtant avëi n cheder tler di valores per chëi che n lëura y na identità sterscia. Do doi ani y mez de lëur iel (NCUEI) ai 10 de mei unì prejentà i resultac dl svilup dl’urganisazion interna.

USP - Passa 200 sculeies la scoles autes tudësces, talianes y ladines ie jic deberieda de viers dl’Europa. L se trata de na scumenciadiva sustenida dala repartizion provinziela Afares comuniteres y dala trëi Ntendënzes per mparé a cunëscer miec l spirt europeich y la strutures. N l di dl’Europa, (NCUEI) ai 09 de mei, iel tla scola auta Kunter a Bulsan unì prejentà i resultac dl proiet “Viac a Bruxelles”.

USP – Bele dan 17 ani fova Carla Comploj unida tëuta su tla Ntendënza ladina per judé a nsenianc y genitores che sculeies cun dificulteies fisiches, psichiches o dificulteies tl mparè. Ti ani ie chësc servisc unì slargià a trëi culaburadëures, ma permò chëst ann ti iel unì recunesciù ufizialmënter la figura de ispetëura. A chësta maniera iel la Scola ladina ala pèr cun l’autra scoles n cont dla ntegrazion y cunsulënza.

USP - Tl cheder dla formaziun di direturs dles scores y scolines ladines à l’Intendënza Ladina organisé na vijita al Museum nü Mansio Sebatum a San Laurënz te Puster ai 26 d’aurì.