Atualità

USP – Pra l Di dla Scola Ladina à l presidënt Durnwalder y l assessëur Mussner garantì che tla scoles ladines ne uniral te chisc tëmps de sparani nia smendrì la stieres di nsenianc, sce se mantën la cumpëida de sculeies. Cun l danmesdì de ajurnamënt per nsenianc y respunsabli dla scoles ladines, iel (NCUEI) ai 04 de setëmber a Al Plan de Mareo unì nvià via l ann de scola (che scumëncia duman cun la lezions).

USP – Cun l ann de scola nuef, che scumëncia n mierculdi 5 de setëmber, vel i orars de scola nueves. Te duta la scoles di luesc ladins sarà per l prim iede dlonch la sada liedia. Tl’elementeres, mesanes y autes ladines vëniel dlonch tenì l merdi y la juebia domesdì scola. Sëula ezezion fej la scoles mesanes de Al Plan y de San Martin.

USP – N merdi ai 4 de setëmber uniral tla chëurt dl palaz provinziel 2, la sënta dl Assessorat provinziel ladin, descurì la scultura de Gherdëina “Im Dialog”. Chësc unirà fat dal vëscul Ivo Muser, l presidënt dla provinzia Luis Durnwalder y dal assessëur ladin Florian Mussner.

USP - L’aministrazion dla scoles de mujiga ti luesc ladins unirà nce tl daunì meneda deberieda cun la scoles de mujiga tudësces. La Jonta provinziela à tenì cont dla situazion particulera dla mendranza ladina y à azetà de nia destaché l’aministrazion dla scoles de mujiga ti luesc ladins. “A chësta maniera à nsenianc y sculeies de plu pusciblteies” spiega l assessëur ladin Florian Mussner.

USP - La biblioteca provinziala “Friedrich Teßmann” inviëia adöm cun le Südtiroler Künstlerbund ala letöra dl autur. Joseph Zoderer lî ai 13 de setëmber fora de so liber: „Mein Bruder schiebt sein Ende auf“.

USP - L “mond dla Scola Ladina” se ancunterà chëst ann ai 04 de setëmber per dl Di dla Scola Ladina y per scumencé l ann de scola cun n danmesdì de ajurnamënt. Pra chësc di a Al Plan de Mareo rujenerà l presidënt dla Provinzia, l assessëur provinziel ladin y l ntendënt ladin. Dopro saral da audì n referat sun la problematica dla tlasses che ne à nia tla man.

USP – I respunsabli dl ciamp de furmazion de rujeneda tudëscia prejenterà ai 28 de agost la nuviteies per l ann de scola 2012/13. Cun chësta manifestazion uniral n prejënza dl presidënt Durnwalder y dl assessëura Kasslatter Mur giaurì l ann dla scoles tudësces y dla scoles de mujiga. Pont zentrel dla cunferënza sarà n referat dl espert de educazion Remo Largo.

USP – La linia de mostres artistiches da d’isté tl Istitut Ladin se stlüj jö cun i chedri de Davide Brandlechner. En vëndres, ai 24 d’agost gnaràl inaudè dales sis da sëra la cuarta y ultima mostra.

USP - Per fé cunëscer l drë valor dla lijëndes ladines al mond culturel talian, vëniel dat ora l liber “Miti ladini delle Dolomiti”. Te chësc proiet dl Istitut Ladin Micurà de Rü iel unì scrit da nuef la lijëndes ladines abinedes adum da Karl Felix Wolff per fé valëi si mpurtanza storich-culturela y per de les dé inant te n cuntest de valuta leterera. L liber nuef vën prejentà n merdi 21 de agost a Urtijëi y n mierculdi 22 de agost a Corvara.

USP – Per l proscimo ann de scola à la scoles de mujiga bele segurà si nsenianc. Chisc dis iel tla repartizion provinziela per l personal unì sëurandat la ncëries per l ann de scola 2012/13.