Atualità
Dala sentada dla Consulta di jogn y dles jones por le grup de lingaz ladin
USP - La Consulta di jogn y dles jones por le grup de lingaz ladin s’à dè jö inier, mertesc ai 15 de merz 2005 a Porsenù cun le plann anual por la promoziun dl laûr por y cun la jonëza te Gherdëna y tla Val Badia. Al pröm post sön la lista dles prioritês por ci che reverda les infrastrotöres él la realisaziun dl Zënter per Jëuni, Ert y Cultura Gherdëina a Urtijëi. I Sorvisc ai jogn de Gherdëna y dla Val Badia festejarà en chësc ann sü 20 agn de fondaziun cun n valgönes manifestaziuns.
Tratan chësc ann dess l’ampliamënt y l’aredamënt dles infrastrotöres dl Laûr por y cun la jonëza de Gherdëna y dla Val Badia gnì miorà inant. Un di majeri proieć da realisé che la Consulta di jogn y dles jones por le grup de lingaz ladin s’à tut dant por le 2005 é le Zënter per Jëuni, Ert y Cultura Gherdëna sön Plaza Sant Antone a Urtijëi. „Tl ann che gnarà déssel spo gnì tut deplü en conscidraziun les strotöres por la jonëza tla Val Badia“ à splighé Wilma Runggaldier che é responsabla dl grup linguistich ladin tl ofize provinzial Laûr por y cun la jonëza. Por arjigné ite y aredè i locai por le Laûr por y cun la jonëza vëgnel metü a desposiziun da pert dla Provinzia indöt 421.000 euro, por la promoziun de ativitês y programs (cosć dl personal, spëises por ajornamënć y formaziuns) tl ćiamp dl laûr por y cun la jonëza indöt 170.000 euro. Pro süa ultima sentada à la Consulta di jogn y dles jones por le grup de lingaz ladin, presidiada da Michaela Taibon, inće valuté domandes de contribuć desvalies che é gnüdes menades da lies ladines al ofize provinzial Laûr por y cun la jonëza. Por festejé i 20 agn de iubileum metarà a jì le Sorvisc ai jogn dla Val Badia da d’altonn de plü manifestaziuns tratan n valgügn fins dl’edema. La Nëus Jëuni Gherdëina à intenziun de invié ia por chësta ocajiun na majera manifestaziun. Pro la sentada él inće gnü rajonè dl proiet „Discobus“ che à suzès te Gherdëna y che é gnü metü a jì inće cun le sostëgn dla Consulta di jogn y dles jones por le grup de lingaz ladin. Ara se trata chilò de n bus da de nöt che condüj les jones y i jogn sigüsc derevers a ćiasa vigni dé tratan le tëmp de saisonn, vëndres y sabeda fora de saisonn. La Consulta di jogn y dles jones por le grup de lingaz ladin à odü de bun edl che la Junta provinziala à metü limić ala venüda de alcol ala jonëza.USP
