Atualità

Scora / Cultura | 28.01.2005 | 12:34

Assessurs ala cultura ti fej vijita a „Young&Direct“

USP - Sce ara se trata de problems d’amur, conflic cun i geniturs o problems de dependënzes tol les jones y i jogn che é te dificoltês sovënz sö contat cun le zënter de consulënza „Young&Direct“. Chilò poi rajonè de sü problems y de sü fistidi, magari tres telefonn o e-mail, restan anonims, y gnon aconsià da porsones espertes. I assessurs ala cultura Florian Mussner, Sabina Kasslatter Mur y Luigi Cigolla s’à fat na idea dl laûr te chësc zënter inier jöbia, ai 27 de jenà.

Vigni ann devënta le numer de jones y jogn, mitans y mituns che se damana la consulënza de „Young&Direct” majer. Insciö s’à, tratan le 2003, 2759 porsones plü o manco jones adressè a chësc zënter de consulënza, à splighé la coordinadëssa Evi Mittersteiner y le aministradù Harald Reiterer ai assessurs Florian Mussner, Sabina Kasslatter Mur y Luigi Cigolla. Indöt él dötaurela cin colaboradus che ćiara da ti pité debota, te na manira anonima y te dui lingac aiüt a jones y jogn. Ara se trata dantadöt de domandes che reverda la sessualité, les dependënzes, l’amur, i desturbs cun le mangé, agresciuns y le significat dla vita. La cossa plü importanata por chi che tol sö contat cun le zënter é l’anonimité. Jones y jogn danter 14 y 15 agn se lascia ion dè consëis debann por telefonn, tres deplü porsones jones mëna sües domandes tres posta eletronica, indere personalmënter tl zënter se lascia ma dër püć odëi. Te püch tëmp pitarà „Young&Direct“ süa consulënza inće a Solaneres, Urtijëi y Bornech. I assessurs é restà imprescionà da dötes les sorts d’aiüt che vëgn pitades da „Young&Direct“ y à sotrissé tan important che n te’ sorvisc é. Ai s’aodass che al foss de plü relaziuns publiches por che ćiamò plü jones y jogn podess se sorvì de chësc zënter.

USP

Galaria dales fotografies