Atualità
Sostëgn por la cultura dl grup linguistich ladin
USP - Dan da püch à la Junta provinziala sön domanda dl assessur ladin Florian Mussner aprovè le plann anual por le sostëgn ala cultura dl grup linguistich ladin por l’ann 2005. Chilò ne tómel nia ma ite i contribuc por manifestaziuns, por la promoziun dla mendranza linguistica y por la colaboraziun cun i Grijuns, mo ince i contribuc ai artisc, ales lies y ai media sciöche ince i contribuc por investiziuns tl ciamp cultural.
Pro les manifestaziun che é sön le program anual 2005 por le sostëgn ala cultura él da nominé le “Dé dla cultura ladina”. “Tl zënter de chësta manifestaziun, a chëra che al po tó pert dötes les porsones interessades, él tematiches che reverda le grup cultural ladin” spliga l’assessur Mussner. Plü o manco anfat é inće le Forum cultural ladin che vëgn metü a jì en colaboraziun cun la Consulta culturala dla Provinzia por le grup linguistich ladin, l’Ofize cultura ladina y chi che se dà da fà por la cultura ladina. Por chëstes scomenciadies vëgnel odü danfora contribuć che amunta a 20.000 euro. “Fora de chël orunse en chësc ann colaborè deplü cun i Rumanc dl Ćiantun di Grijuns por renforzè, tres proieć desvalis, les raîsc linguistiches y culturales che i ùn deboriada”, dij l’assessur Mussner. Por investiziuns dles uniuns culturales ladines por cumprè por ejëmpl trohtes, media o stromënć vëgnel metü a desposiziun por le 2005 indöt 300.000 euro. La soma de 40.000 euro vëgn preodüda por ativitês de formaziun generales dles uniuns o por ativitês singules por ejëmpl la publicaziun de libri. La stampa ladina vëgn sostignida tratan le 2005 cun indöt 52.000 euro y por le sostëgn artistich él gnü metü a desposiziun 419.662 euro.USP
