Atualità
Les condiziuns de cornisc por la reforma dla scora tles valades ladines é danman
USP - Tles prömes trëi tlasses dles scores elementares ladines déssel gnì injuntè ales 26 ores d’oblianza al’edema atuales trëi ores de materies a lîta. Tla cuarta y cuinta tlassa dla scora elementara dess les scolares y i scolars avëi 27 ores d’oblianza al’edema y trëi ores de materies a lîta. Tles scores mesanes ladines déssel indöt gnì pité 32 ores d’insegnamënt de 60 menüc; chësc corespogn a 35 unitês da 50 menüc da sëgn y trëi unitês de materies a lîta. La Junta provinziala à aprovè incö, lönesc, sön domanda dl Assessur ladin Florian Mussner chëstes normes diretives por realisé la reforma dla scora .
„Tla scora elementara y mesana n’él nia tan saurì da partì sö les ores d’insegnamënt al’edema implü ajache al mëss gnì tignì cunt dl model de scora paritetich”, dij l’Assessur Mussner, competënt por la scora ladina. Les ores suraprò mëss gnì partides sö te na manira paritetica; chësc ô dì ch’ares mëss gnì destribuides te na mosöra anfat sön les materies d’insegnamënt tignides por talian y sön chëres tignides por todësch. Les prömes trëi tlasses dla scora elementara ladina dess ciafè pro les 26 ores d’oblianza al’edema atuales ćiamò trëi ores de materies a lîta. I contignüs che dess gnì pità tratan chëstes ores dess les scores podëi se chirì fora autonomamënter. Dala cuarta tlassa insö déssel gnì injuntè ćiamò döes ores d’oblianza de inglesc. La materia “Rapresentaziun figurativa” gnarà a chësta manira n pü redüta. Insciö sarà les ores d’oblianza tla cuarta y cuinta tlassa dla scora elementara indöt 27, chëres dles materies a lîta trëi. Por les materies a lîta po les scores indô stabilì instësses i contignüs . L’Intendënza ladina aconsiëia de pité ores d’insegnamënt di lingac, dl’informatica o de musiga. Tles scores elementares y mesanes dess tl dagnì les unitês d’insegnamënt ester de 60 menüć. Tla scora mesana déssel indöt ma ester pices mudaziuns tl orar dles materies curicolares. Por che chësc sides poscibl déssel gnì trasformè la materia “Educaziun tecnica” tla materia “Tecnologia y informatica”. “Tles materies a lîta dess la materia informatica eventualmënter ćiamò gnì tuta plü en conscidraziun” dij l’Intendënt Roland Verra. “Por ći che reverda l’introduziun dl portfolio sciöche stromënt de valutaziun, l’insegnamënt dl inglesc y dl’informatica ti darunse na gran importanza al ajornamënt dl personal insegnënt” dij Mussner.USP
