Atualità
La scomenciadia „Kulturpass“ va inant ince tl 2005.
USP - Les repartiziuns ala cultura dla Provinzia lascia alsavëi che la scomenciadia „Kulturpass“ va inant ince tl ann 2005. En chësc iade ne mëssel nia plü gnì fat na domanda aposta por ciafè le „Kulturpass“ nü. Chësc ti gnarà menè tl mëis de merz 2005 a vigni uniun che à le dërt de l’avëi. Al vel dal 1 d’aurì 2005 inant, por dui agn alalungia. Le „Kulturpass“ atual vel ciamò cina ai 31 de merz 2005.
Le “Kulturpass“ ciafa chës uniuns cun n’ativité prinzipala tl ćiamp dla cultura. N ater critêr che dà le dërt al “Kulturpass” é che l’ativité mëss gnì fata da colaboradësses y colaboradus por le plü volontariamënter. Implü mëss la uniun ademplì la condiziun de gnì sostignida dai Ofizi ala cultura todëscia, ladina y italiana, dal Ofize laûr por y cun la jonëza, dal Ofize formaziun y dal Ofize biblioteches. Le „Kulturpass“ po gnì dè inant y adorè da dötes les colaboradësses y da düć i colaboradus che fej pert dla uniun. Mostran sö le „Kulturpass“ conzed 49 organisaziuns culturales te döt Südtirol, na reduziun dl 50% sön la cherta d’entrada a manifestaziuns desvalies. Tl ann 2003 à la Repartiziun Todëscia partì fora 7.375 „Kulturpässe“ a dötes les uniuns, inće a chëres ladines. Informaziuns plü avisa podëise ciafè pro la Repartiziun Cultura Todëscia y Familia al numer de telefonn 0471 41 33 11 o pro l’Ofize cultura y scora ladina al numer de telefonn 0471 41 70 20. Les informaziuns é inće sön la plata internet www.provinz.bz.it/kulturabteilung/kulturpass o www.provinz.bz.it/cultura-ladina/kulturpass .USP
