Atualità
L assessëur Mussner rejona cun sculeies y nsenianc de Gherdëina
AST - Pra la vijites ala scoles de Gherdëina à l assessëur ala scola ladina Florian Mussner, ncuei mierculdi, 12 de mei abù ucajion de ancunté sculeies, nsenianc y diretëures te si atività. La ulentà de Mussner ie de avëi n cuntat de persona per udëi miec la situazion y i bujëns dla scoles. L Assessëur cumpanià dal Ntendënt y dal Ispetëur per la scoles ladines, à pudù se fé n cheder dl lëur che vën fat di per di tulan nce a cunescënza i bujëns dla singula strutures. Danter chisc l bujën de na sënta per i servijes ntegrei te Gherdëina.
L cuntat persunel cun i sculeies ie na pert che ti à dassënn plajù ala delegazion dl Assessorat cun Florian Mussner, la referënta persunela Edith Ploner, l ntendënt Roland Verra y l ispetëur Lois Ellecosta. Nsci iel stat i sculeis dla 3B dla Elementera de Sëlva che à ciantà dant vel pitl toch ora dla rapresentazion cun musicales che unirà purteda dant ai 19 de mei te Sëlva. L diretëur Anton Senoner à presentà vel tlasses dla scoles elementeres de Sëlva y S.Cristina ulache l ie ndut 452 sculeies. Cun nteres particuler ti an nce cialà ai locai per l nseniamënt de nfurmatica che unirà d’autonn mo slargià ora. Ai sculeies dla cuinta tlass ti à l Assessëur fat auguresc particuleresc per l’ejam davia che l sarà l ultim ann che l vën fat chësc ejam. Mussner ti à nce spiegà ai sculeies che na tel vijita ie nce de valor per avëi n cuntat cun i nsenianc y educatëures y per i rengrazié de si mpëni.
A S.Crestina iel la scola mesana che aspieta bele dai ani de uni ressaneda. “Sun la cuestion sce la scoles mesanes de S.Crestina y Sëlva vën metudes adum uniral tosc tëut na dezijion“ à dit l assessëur te chësta ucajion. Cun n pez ciantà à i sculeies dla Elementera de S.Crestina saludà la delegazion, n pez ora dl proiet “Il tesoro dle mondo” metù a ji n culaburazion cun la Mujiga de S.Crestina che unirà purtà dant ai 26, 27 y 28 de mei.
Drët nterëssei al’atività dl Assessëur Ladin ie stai i sculeis dla Mesana de Urtijëi che ne à nia sparanià cun dumandes sun cuestions aministratives y persuneles. L diretëur Helmuth Senoner à presentà si plata de nfurmazion per i genitoresc ulache l vën fat al savëi de proiec y azions ma nce d’autra cuestions sciche i resultac dla nrescida danter i genitores. Senoner à purtà dant la ulentà de purté plu trasparënza tl tratamënt di nsenianc fajan nce la pruposta de lauré ora n cheder de lëur per i nsenianc.
L assessëur Mussner se à nce tëut dl’aurela de vijitè la scolines per udëi co che la ti và ai mëndri sculeies dla valeda. La dirijënta de Urtijëi Hannelore Insam à presentà l servisc ntergrà sorissan danterauter la for majera presënza de mëndri che vën da cultures fulestieres che ntënd me n puech de una de nosta rujenedes.
Duman y doduman, 13 y 14 de mei vijiterà l assessëur la soles tla Val Badia.
USP
Galaria dales fotografies
Senoner, Mussner y Verra cun sculeies de Sëlva
Mussner vijitea i locai de nfurmatica te Gherdëina
Foto ast/USP
Foto ast/USP
