Atualità
L program anual per sustenì la cultura ladina ie dat prò
USP – Sun dumanda dl assessëur ladin Florian Mussner à la Jonta Provinziela da permò dat prò l program per l sustëni dla cultura y dla furmazion per la grupa de rujeneda ladina. Te chësc program iel la spëises per manifestazions cultureles y per njinies, cuntribuc, nvestizions tl ciamp culturel, per l’atività de furmazion y per sustenì artic’.
La cura dl’arpejon culturela y l sustëni dla creatività artistica ie dantaldut per la mendranzes de gran mpurtanza, spiega l assessëur ala cultura ladina Mussner. Do chësta idea sustën la Provinzia la cultura ladina. Tl plann anual iel unì numinà i ciamps che vën finanziei o a chëi che l vën dat cuntriuc. Danter la manifestazions che vën finanziedes diretamënter dala Provinzia iel per ejëmpl l di la cultura ladina, per na pëisa de 5.000 Euro. Mplù iel pona nce l forum di aministradëures culturei y artisc’ dla valedes ladines, cun l cumpré de pubicazions che fej ora ndut 15.000 Euro. Diretamënter dala casses dla Provinzia vën nce l finanziamënt dl cuncors per artisc’ jëuni ladins tl ciamp dl’ert figurativa y dl cuncors de leteratura „Auturs ladins scri…“. Tl ann 2004 iel udù dant 353.000 Euro per cuntribuc a programs culturei, nvestizions tl ciamp culturel, per l atività de furmazion y per singuli artisc’. La consulta ladina da jù na si minonga sun la defrënta dumandes te chësc cajo. La decijion sce dé l cuntribut ti spieta ala Jonta Provinziela. N cont dl’atività de furmazion dà la Provinzia cuntribuc per l’atività de lies y de singuli, ma nce per publicazions y vëtes o plates. Per chësta pert culturela iel per l ann 2004 udù dant 40.000 Euro. I media ladins vën sustenì cun n cuntribut de 52.000 Euro.USP
