Atualità
Incuntada dla comisciun por l’integraziun dla direziun raionala de Badia cun l’assessur Mussner
USP - L’assessur ala scora ladina Florian Mussner à incuntè l’edema passada la comisciun por l’intregraziun dla direziun raionala de Badia sön invit dl diretur Otto Moling. Al vëgn damanè almanco le medem numer de insegnanc de sostëgn co l’ann passè, i problems cun l’integraziun aumënta da ann a ann.
En vëindres, ai 26 de merz s’à incuntè la comisciun por l’integraziun tla sënta dla direziun raionala a San Linert por afrontè cun l’assessur competënt la situaziun y i problems dl’integraziun tla direziun dles scores elementares y mesanes dl’alta Val Badia. Ince la consulënta por l’integraziun te scora Sabine Hofer à tut pert a chësta incuntada. Dla comisciun fejel pert chëstes porsones: Rubatscher Veronica, Vittur Daniela, Pitscheider Rita, Clara Elisabeth, Vittur Gabriella, Ferdigg Waltraud, Pizzinini Bruno, Hofer Sabine, Prucker Margit y Dapoz Verena. Dala discusciun fata él gnü fora tler che i problems cun l’integraziun di mituns y mitans cun handicap o dificoltês dl imparè crësc. La consulënta psicopedagogica à sotrissé l’importanza di tesc dles competënzes che dess gnì valutà atramënter por la situaziun linguistica particolara dles valades ladines. L’assessur Mussner à aprijé l’iniziativa dla direziun da ativé na te’ comisciun por podëi portè a discusciun y soluziun i problems spezifics dla direziun. I scolars cun handicap dess gnì desfarenzià sciöche assegnaziun de ores da chi cun dificoltês da imparè por ti gnì plü adincuntra ai pröms. I insegnanc de tlassa mëss se dè jö deplü cun chi che se stënta y al ti dess ince gnì lascè le tëmp de madurì cun la ripetiziun de n ann. Dal’atra pert él ince gnü fora l’importanza de na porsona de riferimënt por i mituns che zënza ne röia nia do al insegnamënt. L’assessur Mussner à sotlinié che tl dagnì ne saràl nia deplü insegnanc de sostëgn, la normativa nazionala va tla direziun da ti dè ma plü insegnanc a chi scolars che à diagnoses aprovades da na comisciun de doturs. Al é ince gnü portè dant le problem cun i scolars che röia te tlasses plü altes zënza savëi un di lingac d’insegnamënt prinzipai. Chilò se tratera de chirì soluziuns por ti insigné i lingac por podëi rové do plü saurì da pert de insegnanc. Al gnarà chirì soluziuns ad hoc tles situaziuns concretes. La mediaziun culturala ne darà nia soluziuns ai problems linguistics concrec, aratâ l’assessur. Le diretur Moling à damanè de ciafè por le proscim ann de scora almanco le medemo numer de insegnanc de sostëgn sciöche en chësc ann y l’assessur Mussner à assiguré de dè so sostëgn por ne lascè l’ann europeich dles porsones cun handicap ch’è stè l’ann passè nia ma protlamaziun.USP
