Atualità
Ultimi dis de iscrizion per cursc de ladin
Usp – L Servisc de Furmazion de Gherdëina, dl Istitut Culturel Ladin „Micurà de Rü“, mët a ji per l’ansciuda de plu cursc de ladin. Sibe prinzipianc che nce de tei che ie bele plu inant possa se lascé nuté su per i cursc che unirà tenii a Urtijëi y te Sëlva.
L curs dl ladin de Gherdëina per prinzipianc ie de dodesc sentedes y jirà inant dal 13 de auril nchin ai 21 de mei 2004 tla Scola d’Ert a Urtijëi. L’acuntedes vën tenides de merdi y vënderdi dala ot a mesa la diesc da sëira, dantaldut tl gherdëina. I argumënc dl curs ie chëi da uni di, purtei a na maniera da mparé la cunescënzes fundamenteles y la drëta pronunzia dla rujeneda a na moda che i partezipanc possé rujené danter ëi. Nplù ulëssen arjonjer che i partezipanc possa nce ntënder i media ladins, sciche l radio, la televijion y la zaites. L curs vën tenì da Erica Senoner. Nteressei possa se lascé nuté su nchin ai 8 de auril 2004. Dal 24 de merz nchin l 26 de mei 2004 uniral tla bibliotech ”Oswald von Wolkenstein” de Sëlva tenì n curs per tei che sà bele n pue’ da rujené. La dodesc sëires unirà tenides de mierculdi dala ot nchin a mesa la diesc da sëira. Te chësc curs vëniel particularmëter dat pëis ala drëta pronunzia. Sëuraprò vëniel fat pratica sun la regules de gramatica y de ortografia. Per chësc curs, tenì da Rosmarie Mussner, possen mo se lascé nuté su nchin ai 22 de merz 2004. Nfurmazions plu avisa giapen dal Servisc de Furmazion dl Istitut Culturel Ladin „Micurà de Rü“, streda Nives 7 te Sëlva. I numri de cuntat ie tres telefonn 0471 773225, fax 0471 794531 y e-mail furmazion.gh@ladinia.net .USP
