Atualità
Heinrich Videsott é l’Intendënt scolastich nü
Heinrich Videsott é gnü nominé Intendënt scolastich y Diretur provinzial por les scolines y scores ladines tratan la sëntada dla Junta provinziala di 22 de otober
BULSAN/BALSAN (USP). Heinrich Videsott, cina sëgn a cé dla Direziun raionala de scora Ladina d’Al Plan de Mareo, é gnü nominé Intendënt scolastich y Diretur provinzial por les scolines y scores ladines tratan la sëntada dla Junta provinziala di 22 de otober. Heinrich Videsott, cina sëgn a cé dla Direziun raionala de scora Ladina d’Al Plan de Mareo, é gnü nominé Intendënt scolastich y Diretur provinzial por les scolines y scores ladines tratan la sëntada dla Junta provinziala di 22 de otober. Cun le 1° de novëmber 2024, surantol Heinrich Videsott l’inciaria de Intendënt scolastich y de Diretur provinzial por les scolines y scores ladines.
Ai 17 de setëmber ti â la seziun ladina dl Consëi scolastich provinzial presenté ala Junta provinziala trëi inoms de candidac, danter chi che Videsott â ciafé la maioranza dles usc tratan la lita socrëta. La Junta provinziala á spo inciarié le Vizepresidënt y assessur por la Formaziun y Cultura ladina Daniel Alfreider da ti comuniché la proposta al Minister dl’Istruziun y dl Mirit de Roma, sciöch’ le Statut de Autonomia vëiga danfora. Incö á l’intendënt nü, Heinrich Videsott, ciafé la nomina definitiva da pert dla Junta provinziala.
Heinrich Videsott é nasciü ai 4 de jená 1969 a Bornech, y al é aciasé a Piculin. Do la scora elementara y mesana a San Martin de Tor, ál studié tl lizeum classich "Vinzentinum" de Porsenú. Al á stlüt jö i stüdi universitars de Matematica a Desproch, y al á insigné por passa 20 agn Matematica y Sciënzes naturales tla scora mesana. Dal 2010 al 2017 é sté Heinrich Videsott umbolt da San Martin, comun de chël che al ê sté aconsiadú y assessur por deplü agn alalungia. Tl 2017 ál surantut la Direziun scolastica raionala d’Al Plan, chëra che tol ite sies scores elementares y döes scores mesanes. Videsott á madorí esperiënzes profescionales desvalies, y al fej pert de deplü gremiums: al é dötaurela rapresentant di direturs y di ispeturs tl Consëi scolastich provinzial, al fej pert dl consëi d’aministraziun dl’Assoziaziun nazionala di dirigënc publics (ANP) y dla Rëi de scores dla Val de Puster.
"Heinz Videsott pó mostré sö recuisic de ezelënza por chësta inciaria. Al á de gran capazités de manajamënt, cotan de esperiënza tl monn dla scora y na gran competënza profescionala", sotrissëia l'assessur provinzial por la Formaziun y Cultura ladina, Daniel Alfreider. "La scora ladina rapresentëia na ressursa fondamentala por la comunité de nostes valades ladines. Les desfidades che la scora mëss tigní fora é cotantes, conscidran che nosc sistem scolastich é dër particolar, paritetich y pluringual, arjigné da ti pité de gran oportunités formatives ales families y a döta la popolaziun scolastica, dala scolina sö cina al’université. La Direziun provinziala Scolines y scores ladines podará se svilupé bun inant, dilan ai impulsc nüs che Videsott savará da porté ite", injunta Alfreider.
USP/red
