Atualità
89.209 mutans y mutons y jëunes y jeuni scumëncia l ann de scola nuef
La cumpëida de sculeies y sculées ie per l prim iede mëndra – i assessëures per la scola mbincia n bon scumenimënt de scola
BULSAN (USP). N juebia ai 5 de setëmber fìnel via la paussa da d’instà per la mutans y i mutons dla scolina y per la sculées y i sculeies. Per de ndut 89.209 mutons y jëuni scumëncel nscila l ann de scola 2024/25. Che l nasc for manco y manco popesc ie cunesciù da duc, y chësc vëijun nce tl mond dla scoles de Südtirol: tl ann de scola 2023/24 n fòvel mo 90.958 che scumenciova scolina y scola, l ann dant tl 2022/23 n fòvel 90.366 che zapova ite, tl ann de scola 2021/22 de ndut 90.454 che scumenciova scola y scolina.
Alfreider: "Sustëni per l svilup ndividuel ie tl zënter"
Tla scolines y tla scoles dla valedes ladines iel unì scrit ite de ndut 2.939 mutons y jëuni. De chisc va 609 te na scolina dl Raion dla Scolines Ladinia, 1.183 sculées y sculeies va te na scola elementera, 629 te na scola mesana dla doi valedes. De ndut 490 jëunes y jëuni va te na scola auta y 28 te na scola prufesciunela. L assessëur per la scola Daniel Alfreider ti mbincia a duc n bon scumenciamënt, truepa legrëza y armunia pra l lëur: "Che l posse vester n ann plën de esperienzes positives y de svilup persunel. Tl zënter iel la sculées y i sculeies y i dëssa unì cumpaniei y sustenii te na maniera ndividuela. Te uniun/a de nëus iel n gran putenzial, unfat sce cun truep talënt o sce cun bujën de sustëni."
Achammer: "La cuejion dla cumenanza te tlas coche rë soziela"
Tla scolines y scoles de rujeneda de nseniamënt tudësch saràl tl ann de scola che vën de ndut 64.026 mutons y jëuni. De chisc va 11.302 te na scolina, 20.478 te scola elementera, 11.472 sculées y sculeies te na scola mesana, 12.346 te na scola auta tudëscia y 8428 na scola prufesciunela. L assessëur per la scola tudëscia Philipp Achammer tol l’ucajion dl scumenciamënt dl ann de scola per fé referimënt ala funzion soziela mpurtanta dl sistem scola: "Truep mutons y jëuni se ncunforta inò sun si cumenanza de tlas. Ajache propi chësta cumenanza ie na rë soziela mpurtanta per mutons y jëuni." L assessëur Achammer ti mbincia a duc i mutons dla scolina, ai sculeies y ai nsenianc, ai derijënc y nce ala families n ann de furmazion da suzes.
Galateo: "Se tenì inant pra la cuntinuità didatica"
Tla scolines y scoles de rujeneda de nseniamënt talian saràl tl ann de scola che vën de ndut 22.244 mutons y jëuni. De chisc iel 3166 mutons da trëi ani insù che va te na scolina, 6083 va te na elementera y 4143 te na mesana taliana. Te scoles autes talianes se n àl scrit ite de 6.895, ntan che 1.957 jëuni va te na scola prufesciunela taliana. Paredlan al ann passà iel chëst ann plu sculées y sculeies tla scola taliana, da coche se ralegrea l assessëur per la scola Marco Galateo, che auza nce ora che "l ie sies diretëures nueves y 68 nsenianc sëuraprò che à n cuntrat de lëur ndeterminà. Ulon mantenì la cuntinuità didatica y i pruzesc inuvatifs. Ie ti mbince a duc, derijënc y nsenianc, al personal aministratif y a duta la sculées y i sculeies y si families n bon scumenciamënt dl ann de scola y rengrazie tl medemo mumënt duc chëi che cumpanieia y sustën i mutons y i jëuni sun si troi de devenì y crëscer", da coche sotrissea Galateo.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/ck/red
