Atualità
La Jonta provinziela dà pro i ubietifs per la scolines
Te si senteda de n merdi passà à la Jonta provinziela de Bulsan dat pro y deliberà i ubietifs per la scolines ladines, talianes y tudësces per l ann de scola 2024/25.
Sun pruposta di assessëures cumpetënc Daniel Alfreider, Philipp Achammer y Marco Galateo à la Jonta provinziela de Bulsan dat pro n merdi ai 23 de auril la finamires per la scolines de duta trëi la grupes de rujeneda.
Tla 17 scolines dla valedes ladines de Südtirol iel unì scrit ite 604 mutans y mutons. Per l ann de scola 2024/25 iel unì preudù de ndut 85 stieres a tëmp plën y leprò mo trëi stieres suplëntes. „Per la scolines dla valedes ladines vëniel cialà dassënn, dlongia al aspet furmatif, al nseniamënt dla rujeneda y ala cunlaurazion de rë cun d’autra scolines. Cun l cuntingënt de personal definì da nuef vëniel garantì che n posse lauré inant a n livel scialdi bon,“ da coche sotrissea l assessëur provinziel ladin Daniel Alfreider.
Per l ann de scola 2024/25 iel unì scrit ite 11.157 mutans y mutons tla scolines tudësces. L unirà giaurì nce scolines nueves: una a Naturns tl raion dl „Generationenpark“, l’autra a Bulsan tl raion dla „Grieser Auen“ y na terza a Persenon ti prei dla „Klosterwiese“. L cuntingënt de personal prevëija 1.362 stieres y oradechël mo 50,5 stieres suplëntes ndeterminedes. „Tl zënter iel for l mut y la muta y si bujëns furmatifs. Cun la ressources fates ora saràl mesun curì l bujën per l ann furmatif che vën,“ dij l assessëur provinziel tudësch Philipp Achammer.
Tla scolines talianes saràl tl proscimo ann furmatif 171 sezions, una deplù de chëst ann. N plus iel nce pra mutans y mutons autramënter abli, cun n plus de ades 23 percënt. „Per pudëi ti vester a puntin ala ndesfidedes dl daunì uniràl tëut su sëuraprò mo cater padagoghes/gs tla scolines talianes,“ da coche stlarësc l assessëur per la scola taliana Marco Galateo.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/an/dl
