Atualità
Prima senteda deberieda di trëi Cunsëies provinziei nueves di Jëuni
I trëi Cunsëies provinziei nueves di Jëuni fej ora deberieda l Cunsëi provinziel di Jëuni de duta trëi la grupes de rujeneda, che à abù inier ai 10 de auril si prima senteda de lëur.
La Jonta provinziela de Bulsan à tla enes passedes numinà da nuef i Cunsëies provinziei di Jëuni per la grupa de rujeneda ladina, taliana y tudëscia per i ani 2024-2026. Deberieda iesi l Cunsëi provinziel di Jëuni dla trëi grupes de rujeneda. La cumëmbres y i cumëmbri de chësc gremium che va sëura la grupes linguistiches ora se à ancuntà per si prima senteda de lëur. Prejënc nce i trëi assessëures provinziei per i jëuni.
Dan la prejentazion dla/di cumëmbri/es per la gran pert nueves dl Cunsëi provinziel à i trëi assessëures cumpetënc Daniel Alfreider, Philipp Achammer y Marco Galateo fat referimënt ala mpurtanza de chësc organn y de si ncëria: "La ncëria dl Cunsëi provinziel di Jëuni ie propi de gran mpurtanza per la Jonta provinziela, acioche l posse unì tëut dezijions ulache i nteresc dla generazion jëuna posse avëi na si fazion", da coche l assessëur Alfreider à auzà ora. "L Cunsëi provinziel di Jëuni à la funzion y fazion mpurtanta de vester l canal de comunicazion di y per i jëuni y de ti dé cunsëies ala Jonta provinziela pra cuestions che à da n fé cun la jëunes y i jëuni", da coche à dit l assessëur Philipp Achammer.
L Cunsëi provinziel possa fé prupostes de scumenciadives y azions, ma nce purté ite ponc de ududa jëuni tla prozedura legislativa. L lëur tl Cunsëi provinziel di Jëuni deberieda dà l mesun de mëter tl zënter cuestions deberieda che toca la trëi grupes de rujeneda. Un de si aspec fundamentei te chësta legislatura ie chëla de ti purté plu daujin al mond dla istituzions l mond di jëuni, coche à sotrissà l assessëur provinziel Galateo, che vëija chësc nce coche na si ncëria persunela: "L ie de mpurtanza primera che la jëunes y i jëuni vënie trates/c ite ativamënter tl pruzes legislatif, à pu la leges nce na fazion per si daunì."
I trëi Cunsëies provinziei di Jëuni se à bele ancuntà per si senteda custituënta per lité - despartì per grupa de rujeneda - si presidënt/a cun si vize: Felix Nagler y Nicole Insam per l Cunsëi di Jëuni ladin, Iris Achmüller y Alex Giovanelli per l Cunsëi tudësch y Giusy Cupo y Larissa Bianchi per l Cunsëi talian. Paroles de salut iel per l’ucajion nce stat da pert dl diretëur dl Ufize provinziel tudësch per l lëur de y cun i jëuni Konrad Pamer, l diretëur dl Ufize provinziel talian per l lëur de y cun i jëuni Claudio Andolfo y l diretëur dl Ufize provinziel per la Cultura y Junanza Ladina Jürgen Runggaldier.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red/mac/dl
