Atualità
Sustëni de ativiteies y nvestimënc culturei: criteres nueves
La Jonta provinziela à mudé i criteres per dumandes de cunzescion de n sustëni per ativiteies y nvestimënc culturei y artistics y à fat plu scëmpl la rendicontazion y l termin nuef per la dumandes.
La Jonta provinziela à tëut la dezijion de mudé i criteres per la cunzescion de n sustëni per ativiteies y nvestimënc culturei y artistics. L fin dla mudazions ie che la lies giape na resposta sun l contribut damandà bele a scumenciamënt dl ann. Mplu vën la rendicontazion scemplificheda. L termin per dé ju la dumandes per la cunzescion de n cuntribut provinziel per l’atività culturela 2024 ie ai 29 de dezëmber 2023.
"L ie de gran mpurtanza sustenì l’ert y la cultura ladina per mantenì, sustenì y purté inant l’identità di ladins y dla ladines y per renfurzé la comunità", nsci dij l assessëur Daniel Alfreider che à purta dant la deliberazion. Chësc regulamënt nuef vëigh dant che la prozedura de cunzescion dl contribut y dla licuidazion dures manco giut.
La Jonta provinziela à mudà i criteres per l sustëni de ativiteies y nvestimënc culturei y artistics. L ie unì fat la mudazions che vën do:
- l termin per dé ju la dumanda per l’atività ordenera ie unì sburdlà dai 31 de jené ai 29 de dezëmber 2023.
- la rendicontazion dl contribut ie unida scemplificheda: la va mé plu de bujën de dé ju na lista dla contes aldò dl fac simile metù a desposizion dal ufize mpede duta la singula contes; la contes ie mé da mustré su pra i cuntroi a cajo;
- l’urganisazions che fej dumanda muessa avëi n’atività cuntinuativa de almanco doi ani tla provinzia de Bulsan y muessa avëi almanco 5 cumëmbri/cumëmbres
- l’ urganisazions possa se damandé, adum cun la dumanda de cunzescion dl vantaje economich, la licuidazion de n’antizipazion tla mesura de al plu l 80% dl cuntribut cunzedù per l ann de referimënt.
La dumandes possa unì mandedes nchina ai 29 de dezëmber 2023 per posta, e-mail o pec ala Provinzia Autonoma de Bulsan-Südtirol, Ufize Cultura ladina y Junëza 18.2, str. Bottai n. 29, 39100 Bulsan (culturaladina@provinzia.bz.it, repartiziun-scola-cultura-ladina@pec.prov.bz.it ). I formulers ie da abiné sun la plata internet http://www.provinzia.bz.it/la/sorvisc-a-z.asp?bnsv_svid=1007900 o diretamënter tl Ufize Cultura y scola ladina, Bindergasse 29, Bulsan, tel. 0471- 417021.
Per nfurmazions plu a puntin sun la pusciblteies de finanziamënt, pudëis ti scrì a culturaladina@provinzia.bz.it
La dumandes de contribut per nvestimënc culturei, proiec culturei, ativiteies artistiches y per publicazions possa nce unì dates ju n chësta ucajion o ntan dut l ann.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red/san
