Atualità
Scores elementares: Resultac INVALSI ezelënc tles proes de Inglesc
Ales proes á tut pert 185 scolars/res dles elementares, 205 scolars/res dles mesanes y 174 dles scores altes.
Por ci che reverda les proes INVALSI dl ann de scora 2022-2023 él da alzé fora trëi novités che interessëia la scora ladina: por le pröm iade s’á scolars y scolares dles scores elementares dé jö cun la proa de Inglesc. I studënc y les studëntes dl ultim ann dles scores altes s’á por le pröm iade dé jö cun la proa de lingaz. Terza novité: la mosoraziun dl todësch, sciöch’ lingaz de insegnamënt, do agn che al gnê ma mosoré le talian, por scolars y scolares dla terza mesana.
Inglesc
La dërta sorpreja vëgn dai scolars/res dles elementares (degré 5) che á afronté la proa de inglesc. I resultac é direto ezelënc: le 97,8% di scolars/res arjunj, tla proa de Listening (ascuté) le livel A1 dl Cheder Europeich de Referimënt por i Lingac. Le 95,1% röia sö al livel A1 ince por ci che reverda le Reading (letöra). Le resultat é straordinar, sce an conscidrëia che tles scores ladines mët i scolars/res man da imparé inglesc impormó tla cuarta classa, deperpo che tl rest dla Talia mëti man bele te pröma classa.
Le sistem scolastich ladin mostra sö numeri valgamia basc (185 é i scolars/res che s’á dé jö cun les proes tla scora elementara) y an se stënta da podëi le paridlé cun les atres realtés dla Talia. D’atra pert, te contesc scolastics nia tan dalunc dal ladin, sciöch’ chël dla Val d’Aosta, röia sö la porcentuala dl Listening ma al 87% - olache al röia ince les atres bunes regiuns talianes (Trentin, Lombardia, Venet, Friul-Aunejia-Julia, Emilia-Romagna y provinzia da Balsan). Vëi él ince che te chëstes regiuns vá le livel dl Reading ciamó sö cun la porcentuala, mo ara ne röia mai sö al livel di ladins, che se mët fora te trames les abilités sciöch’ i mius dla Talia.
L’Inglesc arjunj resultac de ezelënza ince ai degrá 8 y 13 (terza mesana y cuinto ann de scora alta). Al degré 8 arjunj le 98% di scolars/res (200 sön 204) le livel A2 tl Reading, le livel plü alt preodü por chësta classa. Por ci che reverda le Listening vá la porcentuala n sich jöpert (93,1%) mo resta dagnora danter les plü altes dla Talia. Ma les scores todësces dla provinzia da Balsan á fat miú (94,6%).
Da alzé fora él sambëgn ince i studënc/tes dl ultim ann dles scores altes. Tl Listening arjunj le 88,5% le livel B2, tl Reading le 93,1%. Chës regiuns che mostra zënza de bugn resultac tles mosoraziuns, mëss indere conscidré n arbassamënt bindebo sëch por ci che reverda les competënzes tl lingaz inglesc. La scora ladina arjun plü o manco le livel dles scores provinziales todësces (86,3% tl Listening y 84,1% tl Reading).
“I bugn resultac dles proes INVALSI é la desmostraziun che le sistem scolastich paritetich dla Val Badia y de Gherdëna garantësc n bun aprendimënt ince di lingac foresti” dij l’assessur provinzial por la Formaziun y Cultura Ladina. “Le sistem pariteich ti consënt ai ladins da imparé bun le ladin - le lingaz dla uma - adöm al talian y al todësch: sëgn savunse ince che al porta de bugn früc tl lingaz inglesc”.
L’intendënta ales scores ladines dla provinzia da Balsan, Edith Ploner, porta inant bele da plü agn inovaziuns didatiches por imparé i lingac y por promöia le plurilinguism. Ara dij: “Al é interessant conscidré les desfarënzies dla scora ladina respet al trend nazional: tl rest dla Talia é la competënza dl Listening (ascuté) scialdi plü bassa respet ala competënza dl Reading (letöra). Por les scores elementares ladines, deperpo, velel le contrar: la competënza tl ascuté é plü alta, caje unich tla Talia. Le risultat podess ester colié ales metodes didatiches tutes ca por i lingac, y ala cosciënza fonologica che i mituns y les mitans svilupëia bele adora, por desfarenzié i sonns di lingac desvalis”.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red/cs/san
