Atualità
Covid-19: mosöres nöies de sostëgn ales artistes y ai artisć
La Junta á aprové le terzo pachet de mosöres economiches a sostëgn di artisć locai por na soma complessiva de 2 miliuns de euro. Domandes cina ai 3 de agost.
Aiüc economics nüs é gnüs aprová dan da püch dala Junta provinziala a bëgn dles artistes y di artisć locai, öna dles categories plü atocades dal’emergënza Covid-19. Al 1 de jügn él gnü aprové sön proposta di trëi assessurs por la cultura Daniel Alfreider, Philipp Achammer y Giuliano Vettorato n plan economich nü por chësc setur y ponsé ai artisć y ales artistes che podará damané cina ai 3 de agost n sostëgn straordinar de 5.000 euro vignöna y vignun.
“Dal mëteman dla crisa dl coronavirus fajunse le poscibl por ti dé n sostëgn ales porsones che laora tl monn cultural ladin y por trasmët ala popolaziun le valur dla cultura te sües formes plü desvalies”, á dit l’assessur por la cultura ladina Daniel Alfreider. L’assessur por la cultura todëscia Philipp Achammer á sotligné che al gnará finanzié pordüdes de davagn, sovenzioné investimënc digitai y sostegní le ativites culturales y l volontariat cultural. Ince l’assessur por la cultura taliana Giuliano Vettorato á recordé che chësta mosöra é n vare inant de sostëgn por raforzé le setur dla cultura y la promoziun de nosc teritore.
Indöt él preodü n sostëgn ajuntif de 2 miliuns de euro: cun chësta soma él la Provinzia che á metü a desposiziun indöt 9 miliuns de euro por le terzo pachet de mosöres culturales.
Che vëgn pa sostigní?
Al vëgn sostigní artisć y artistes de profesciun de düc trëi i grups linguistics. La sovenziun straordinara é de 5.000 euro a artist/artista. Les artistes y i artisć che á n numer de CVA (Partita IVA) mëss fá domanda de contribut-Covid de 5.000 euro pro la Repartiziun provinziala Economia. Chësc contribut - Covid ne pó nia gní acumulé cun la sovenziun por artistes y artisć. La domanda pó gní fata da atira inant cina ai 3 d’agost dl 2021 pro öna dles trëi repartiziuns por la cultura (todëscia, taliana o ladina).
Cai é pa i recuisic?
I recuisic é che i artisć y les artistes de profesciun n’á nia n contrat de laur dependënt de passa le 50% (contrat a tëmp parzial) dl Südtirol o che laora tl Südtirol. L’ativité artistica é da descrí tl curriculum vitae. Implü mëssel gní desmostré d’avëi realisé y presenté al publich altamo dui proiec sides dl 2018 che dl 2019 (rapresentaziuns, mostres, letöres, publicaziuns de vigni sort). Les artistes y i artisć südtirolesc, che ne vir nia tl Südtirol, mëss avëi realisé i proiec dl 2018 y dl 2019 tl Südtirol. Da chësta mosöra él stlüt fora i artisć y les artistes che á n contrat de laur dependënt de passa le 50%, é en ponsiun o frecuentëia le pröm percurs universitar de formaziun artistica. Artistes y artisć che ciafa dl 2021 n contribut-COVID dla Repartiziun provinziala Economia de 5.000 euro é stlüc fora da chësta mosöra. La sovenziun é coliada ala realisaziun dl proiet aristich, che vëgn fat do che al é gnü dé jö la domanda.
Por nen savëi deplü söl sorvisc y la documentaziun nezesciara: https://www.provinzia.bz.it/la/sorvisc-a-z.asp?bnsv_svid=1036144
USP/USP
