Atualità
De dla Memoria: Rode important dla scora por recordé y ponsé al dagní
Cuntra le desmentié: L’assessur por la scora y cultura Daniel Alfreider y l’intendënta Edith Ploner sotlignëia en gaujiun dl De dla Memoria i valurs fondamentai dla formaziun y dla democrazia.
La data de ai 27 de jená, tratan chëra che tl 1945 él gnü demolí les pontorines de Auschwitz tl 1945, é gnü detlaré “De dla memoria” por ne desmentié nia l’Olocaust. Dal 2005 vëgnel recordé en chësc de les vitimes dl sistem totalitar dl nazionalsozialism che á porté tröp dolur tl’Europa y te döt le monn. “Recordé les vitimes, sües stories y sü recorc é fondamental por che nosta sozieté restes cosciënta di gran valurs dla democrazia, dla convivënza pazifica y dla educaziun ala pesc. La formaziun tles scores é la fondamenta nia ma por savëi ci che é sozedü, mo ince por le capí y por ester cosciënc ince por le dagní y da se impegné por la toleranza, la solidarieté, la dignité umara y i dërc dla porsona”, sotlignëia l’assessur Daniel Alfreider.
Chësta perioda dla storia á gaujié vitimes sura döta l’Europa y le monn y insciö ince tl Südtirol y tles valades ladines. “Por che al ne sozedes mai plü él fondamental che chësc capitul dla storia vëgnes tematisé tres indô tles scores, ince tl raport cun i fac che sozed aldedaincö. La memoria é la basa por analisé ince i conflic che sozed dötaurela y al é nosc compit da formé scolares y scolars cosciënc”, dij l’intendënta Edith Ploner.
En ocajiun dl De dla memoria é düc y dötes inviá da fá na reflesciun sön le tëmp passé: “Conësce la storia nes porta a tó dezijiuns plü orientades tl vers dl dagní y da investí nosc tëmp por i valurs dla pesc, dla liberté y dla democrazia”, insciö Alfreider y Ploner.
USP/rc
