Atualità
Stipendiums por scolars ti internac, regolamënt nü
La Junta á ajorné i recuisic de amisicun y i imporc di stipendiums por scolars che vir te internac. Le concurs gnará tosc publiché
Ince por l’ann de scora 2020/21 garantësc la Provinzia n sostëgn sot a forma de stipendiums por scolares y scolars dla scora d’oblianza, dla scora secondara y dla scora profescionala che jará a vire tratan l’ann de scora te internac dalunc dales families. Al gnará ajorné i recuisic de amisciun. Ince i imporc di stipendiums gnará ajorná. Le regolamënt nü por i stipendiums é gnü aprové inier (28 de lugio) dala Junta provinziala sön proposta dl assessur competënt, Philipp Achammer.
La basa por calcolé l’import resta la medema sciöche l’ann denant y sará la detlaraziun unificada dl davagn y dl patrimone (DURP) y le valur dla situaziun economica (VSE) por ci che reverda le grup familiar. Al é gnü a se le dé indere mudaziuns por ci che reverda i liví: impede 7 liví sciöche l’ann passé nen sarál sëgn 9. Le limit VSE é gnü porté da 3,50 a 4. Implü él gnü alzé le limo dl VSE de 0,50 punc por vigni comëmber dla familia che vir aldinfora dla familia por gaujies de stüde, calcolan ince chël che fej domanda.
La valutaziun dl livel de aiüt é mudada: cina a n valur VSE de 1,00, l’import de aiüt al stüde por i scolars aldinfora de ciasa é de 3.200 euro. Por i scolars che ne dorm nia te internat (Tagesheimschüler) él de 2.240 euro. Cun n valur VSE danter 3,61 y 4,00 é le import dl stipendium por scolars te internat de 1.200 euro y por i “Tagesheimschüler” de 850 euro.
“Sön la basa dl regolamënt nü fajará la Junta n concurs por l’assegnaziun di stipendiums ai 11 de agost”, dij l’assessur Achammer che inviëia les families da arjigné ca la domanda y le DURP y le VSE pro i patronac o i zëntri de consulënza fiscala (CAAF). Na lista é da ciafé sön la plata internet por i stipendiums. Deache la detlaraziun DURP cun le VSE mëss bele gní presentada por fá la domanda de stipendium, él da aconsié da fá n apuntamënt le plü atira che ara vá.
Deache les domandes do stipendiums pó ma gní fates online él debojëgn dl SPID digital o dla cherta di sorvisc ativada. Les domandes pó gní presentades ince tres l’area personala de myCIVIS o tres la rëi zivica CIVIS.
USP/jw/sf
