Atualità
Coronavirus, le vizepresidënt ladin Alfreider: “Stun inant a ciasa“
724 caji te döt Südtirol de porsones positives al Coronavirus, de chëstes 118 tles valades ladines. L’assessur por la scora y cultura ladina Daniel Alfreider á tut pert incö ala conferënza stampa.
Le numer dles porsones positives al Coronavirus tl Südtirol é atualmënter ai 23 de merz de 724 caji. Indöt él gnü fat cina sëgn 6.094 tesć sön 4.008 porsones. Le Laboratore de microbiologia y virologia dl'Aziënda sanitaria provinziala á registré 42 caji nüs (sön 376 tesć).
Por ci che reverda la situaziun atuala dles valades ladines él 118 porsones che é resultades positives al Coronavirus. Te Gherdëna él cina ai 23 de merz indöt 86 tesc che á dé arat positif, 32 tla Val Badia. Le numer dles porsones en isolamënt a ciasa é de 436 tles valades ladines. A Gherdëna nen él 371 cun 6 caji demanco co inier y tla Val Badia él n aumënt da 52 a 65 caji de isolamënt a ciasa. Le Comun vijin de Ciastel cumpëda baldi 48 caji de porsones resultades positives al Coronavirus y 110 caji de isolamënt a ciasa.
“Al é na situaziun de emergënza che i afrontun dötaurela düc adöm. Al é gnü tut mosöres dër drastiches y cun de gran implicaziuns por la vita de vignun de nos. Daimpröma oressi porchël rengrazié dötes les ladines y düc i ladins por avëi daidé da les respeté y da se tigní ales mosöres”, á dit le vizepresidënt y l’assessur por la scora y cultura ladina Daniel Alfreider che á tut pert ala conferënza stampa da incö 23 de merz a Balsan adöm al presidënt dla Provinzia, Arno Kompatscher.
“Le coronavirus atachëia la cossa plü importanta – insciö Alfreider - y preziosa che nos un, nosta sanité. Porchël él nosc compit da fá de döt por archité la defujiun de chësc virus. Porchël él de gran importanza da se tigní ales mosöres por odëi i efec. La gran pert dla popolaziun le fej y chësc é important por rové fora de chësta emergënza.”.
L’assessur á anuzé l’ocajiun por rengrazié dötes les porsones che laora ti seturs dla sanité, doturs, infermiers, personal tles ciases de palsa y de düc chi che laora tl setur sanitar. “Giulan ince a döt le personal dles ciases de palsa a Urtijëi, a Ciastel y a San Martin de Tor por so laur prezius de assistënza y acompagnamënt de nüsc seniors te chësta situaziun complicada”, á dit Alfreider recordan ince le laur prezius di ombolc di Comuns ladins y dles forzes dl ordinn chi dles botëghes, di autisc dles corieres, dla proteziun zivila y düc chi che fej dötaurela n sorvisc ala sozieté.
Por ci che reverda la scora ladina él gnü stabilí da jí inant cun le insegnamënt da ciasa tres la colaboraziun dla Intendënza y Cultura ladina porvan da sostigní les families le plü che ara vá. Alfreider á recordé dl gran impat de chësta crisa sön döta l’economia dles valades ladines. “L’artejanat, le turism y l’agricoltöra á na fondamënta sterscia che á funzioné dër bun cina sëgn! Porchël podun ti la fá düc adöm da pié ia indo do che la situaziun de emergënza é passada”, insciö Alfreider.
Atualmënter él la cossa fondamentala, insciö l’assessur, da archité la defujiun respetan les regoles da evité vigni contat y da ne jí nia fora de ciasa, ater co te caji de emergënza. L’apel é inscö da resté a ciasa y che vignun dëides y fejes süa pert.
USP/rc
Galaria dales fotografies
