Atualità
Scores de musiga: de plü personal
Por tó y jí cun les listes d'aspeta dles scores de musiga ó la junta provinziala tó sö tl organigram i diesc posć metüs sö y ajunté ciamó diesc posć.
Por ti ester ales listes d’aspeta tles scores de musiga y ti jí adincuntra ai dejiders de formaziun le miú che ara vá, s'é la junta provinziala gnöda sön la proposta dl assessur provinzial por la scora todëscia Philipp Achammer, fata l’ann passé, da alzé man man le contingënt dl personal dles scores de musiga. Incö (ai 2 de messé) á la junta provinziala fat ciamó n vare inant, por garantí cun de plü personal de plü posć por i scolars y les scolares y jí inant cun l'ampliamënt metü man l'ann passé.
L'ultimo ann de scora á 17.000 scolares y scolars frecuenté öna dles 52 scores de musiga ladines y todësces y ciafé na formaziun musicala o stromentala. „Ince por les mitans y i mituns dles valades ladines fej les leziuns de musiga pert dl imparé global che ne pó nia mancé", sotrissëia l'assessur provinzial por la scora ladina Daniel Alfreider. L'ann passé s'á scrit ite 1150 di 17.000 scolars y scolares te scores de musiga ladines.
"Bele tratan l’ultim ann scolastich á diesc maestri de musiga implü metü man da lauré", dij l'assessur provinzial Achammer. "Incö se sunse gnüs sön ciamó döes mosöres: da öna na pert dessel gní metü i diesc posć cheriá l'ann passé tl organigram, y dal'atra dessel gní tut sö ciamó diesc maestri de musiga." Le personal implü surantolará dantadöt materies olache al é listes d'aspeta dër lunges. Implü dessel daidé lauré fora l'insegnamënt musical de basa y lauré para pro l'insegnamënt stromental tla scora elementara y mesana.
USP
