Atualità
Da fauré inant furmazion per trainer de „Wellness“
Usp – N curs a pèr dl lëur per trainer de „Wellness“, vëniel da fauré 2004 pità dala Scola Profesciunela "Luis Zuegg" de Maran. L curs ie de ndut 900 ëura y dura nchin d’auton 2005. Nteressei possa nrescì velch de plu pra n domesdi de nfurmazion l merdi ai 16 de dezëmber 2003 tla Scola Profesciunela da hotelier Kaiserhof a Maran.
Bele l ann passà de nuvëmber ova la Scola Profesciunela per l Cumerz, Artejanat y Ndustria "Luis Zuegg" de Maran metù a ji per l prim iede n curs per trainer de "Wellness". De setëmber an pona pudù sëurandé 22 diplomes y per via dla gran dumanda uniral n auter ann inò metù man cun n curs nuef che n dëssa chëst iede pudëi fé a pèr dl lëur. Per fé pea chësc curs vëniel damandà na furmazion profesciunela te chësta direzion, n sudi tla direzion de scienzes dl sport, dla pedagogia dl sport o speriënza tl lëur de almanca trëi ani. Partezipanc che ne à mo deguna furmazion tla massage, muessa fé sëuraprò 300 ëura de curs per massage rilassanta per pudëi giapé l diplom. L curs per trainer de "Wellness" ie de ndut de 900 ëura cun 580 ëura de teoria y 320 de pratica. Fé pea possa al plù 16 persones che puderà finé l curs per la fin de nuvëmber 2005 cun l diplom profesciunel da „Trainer de Wellness“. Per presenté mo miec l curs vëniel metù a ji na sëira de nfurmazion n merdi ai 16 de dezëmber dala set da sëira tla scola „Kaiserhof“ de Maran. Se nuté sù possen nchin ai 30 de dezëmber 2003, y de jené uniral pona fat la selezion. Velch de plù sun chësc curs ie da nrescì dala scola profesciunela "Luis Zuegg" a Maran, pra Hannelore Schahall Scola, l merdi dala 8.00 ala 13.00, de mierculdi y juebia dala 8.00 ala 12.00 y dala 14.00 nchin ala 17.00. L numer de telefonn ie l 0473-274 900.USP
