Atualità
Consultes Provinziales di studënc: Incuntada di coordinadus regionai
Na delegaziun dla consulta di studënc á tut pert a na incuntada tl Ministér dl’Istruziun, dl’Université y dl’Inrescida a Roma.
Dai 21 al 23 de jená 2019 s’ál incunté a Roma i coordinadus regionai regionales dles Consultes di studënc tl grem istituzional dl MIUR (Ministér dl’Istruziun, dl’Université y dl’Inrescida) nominé UCN (Ufize de Coordinamënt Nazional). I 20 studënc delegá da döta la Talia é gnüs acompagná dai dozënt referënc de vigni regiun. Insciö á ince le vizepresidënt Manuel Bauer dla Scora d’ert Cademia y le dozënt referënt Lois Kastlunger podü tó pert cun na delegaziun de studënc ladins. Le compit prinzipal dl UCN é da arjigné ca le program por la incuntada dl CNPC (Consëi Nazional di Presidënc dles Consultes) che tól ite düc i passa 100 presidënc dles Consultes Provinziales di studënc.
Te so documënt final á i studënc dit tler che ai s’aspeta la presënza dl Miníster Bussetti pro la proscima incuntada dl CNPC ala fin de merz plü sigü a Matera sciöche capitala europeica dla cultura 2019. Do na discusciun aprofondida y de confrunt á i delegá di studënc individué por dailó cin comisciuns che dess traté chëstes tematiches: linies guida PCTO (percorsi per le competenze trasversali e per l’orientamento) – dërt al stüde – rapresentanza: formaziun, pert y funziuns UCN – analisa dl ejam de stat – zitadinanza ativa: Europa y legalité. Tla discusciun finala cun i studënc él intervegnü al post dla direturia generala Giovanna Boda le dirijënt dl Ministér Giuseppe Pierro che ti á assiguré le sostëgn ch’ai se damana por lauré inant sön tematiches importantes dla scora a livel nazional.
Ince i dozënc referënc – sot ala bachëta dl coordinadú nazional Antonio Salvatore Dinallo – á podü se confronté sön argomënc de interes general sciöche la funziun dles consultes tla emergënza educativa, n proiet dles consultes por cherié la figöra de n "garant dla legalité", la motivaziun ala partezipaziun ativa bele tles scores mesanes y la formaziun di rapresentanc tles consultes. Pro la proscima incuntada dl CNPC gnará chëstes tematiches aprofondides cun i dozënc referënc dles consultes de dötes les provinzies.
L’aspet che ne pó nia gní sotvaluté de chëstes incuntades é le valur di raporc personai danter düc chi che tol pert, le valur dla conescënza y azetanza de situaziuns tan desvalies y le sforz general de mioré le setur dla scora aladô di bojëgns d’aldedaincö ince dal punt d’odüda di studënc instësc.
USP
Galaria dales fotografies
