Atualità
Premiazion dl cuncors ladin „Portes“
USP – Stories sun l handicap y i emarginei ie stat l argumënt dl cuncors „Portes“ metù a ji per sculeies dla scoles elementeres y mesanes ladines. I lëures di sculeies, fai n uncajion dl’ann europeich dedicà a persones cun handicap, ie unic premiei n juebia ai 20 de nuvëmber a Al Plan de Mareo. Te chësta ucajion iel nce unì presentà tesc’ de n sculé autist. La manifestazion drët sentida ie unida cumpanieda dala presënza dl Assessëur ala Scola Ladina Florian Mussner. Un n tema ie unì scrit ntëur per n pez de teater che ie unì tëut su dala RAI Ladina y unirà mustrà ai 27 de nuvëmber.
I sculeies ie unic premiei dal Assessëur ala Scola Ladina Florian Mussner, l Ntendënt ala Scola Ladina Roland Verra, l Ispertëur Lois Ellecosta, Carla Comploj che mëina l servisc per consulënza y ntegrazion scolastica, y belau duc i diretëures dla scoles ladines. L’ Ntendënza Scolastica Ladina y la RAI Ladina à n ucajion dl ann europeich dedicà a persones cun handicap scrit ora l cuncors sun l argumënt „portes“ – portes che se gëura... de si forza y zënza aiut d’autri. Ndut iel stat 119 sculeies dla scoles elementeres y mesanes ladines che à fat pea chësc cuncors. De chisc ie unic premiei diesc sculeies. Dla scola elementera iel stat Markus Crepaz (4. tlass elementera Urtijëi), Florian Walpoth (4. tlass elementera Urtijëi), Egon Frenes (5. tlass elementera La Val) y Barbara Tolpeit (5. tlass elementera La Val). Danter i sculeies dla scoles mesanes ie unic premiei: Marina Insam (1. tlass mesana S. Cristina), Patrick Wanker (2.tlass mesana Urtijëi), Youssef Kasmi (2. tlass mesana Urtijëi), Ursula Stuffer (2. tlass mesana S. Cristina) y Maddalena Caterisano (3. tlass mesana Urtijëi). L prest per la tlass à venciù la 2. mesana de Al Plan. Ala cumiscion ti a plajù l plù l tema de Marina Insam, che ie unì scrit ntëur a n pez de teater y nce purtà dant ala premiazion de Al Plan. L pez ie unì tëut su dala Rai Ladina y unirà ntergà per l program „Portes“, te chël che la RAI presënta l proiet. Chësc program unirà mustrà n juebia ai 27 de nuvëmber 2003 dala 20.30 sun l terzo canal dla RAI. Pernan che n à pudù sëurandé i pesc’ iel mo unì presentà l liber dl sculé Patrick Wanker dal titul „Ciao, sono Patrick“. Patrick Wanker ie autist che comunicheia tres aiuc. Si maestra, Alessandra Zardo à fat a na maniera che l vënie a se l dé comunicazion cun duc chëi liejerà chësc liber. Patrick ie n ejëmpl de n sculé ntegrà bën. I presënc ie stai tuchei dal sentì di sculeies, che à demustrà che l ie mesun avëi sensibltà de viers de persones cun hanicap y che duc possa crëscer tres chësc.USP
