Atualità
Musiga y ert: proiet de prestige danter Fondaziun Haydn y Cademia
Les cuintes classes dl Lizeum Cademia protagonistes de n proiet musical dediché ales operes dl componist Rusconi ospité dala Fondaziun Haydn por OPER.A.20.21.
Tl cheder di proiec musicai metüs a jí en colaboraziun danter l’Intendënza ladina y la Fondaziun Haydn él gnü a se le dé n proiet particolar te chël che al é gnü lauré te produziuns musicales a livel profescional por la sajun operistica y sinfonica de musiga classica contemporana.
Al se trata de n proiet pilot de musiga y ert dal titul "Artist in residence" cun les scolares y i scolars dal Lizeum d’ert "Cademia" y Scora profescionala por l'artejanat artistich Gherdëina adöm al componist Roberto David Rusconi. I partezipanc á fat para n percurs didatich musical inovatif a pié ia dai contignüs dles operes dl componist cun labors musicai te classa, sesciuns de educaziun al’orëdla (ear training) y na introduziun ala musiga dl vintejimo secul cun na atenziun particolara al confrunt danter musiga y pitöra.
Ai á realisé operes artistiches desvalies y multimediales por l’opera "Dionysos rising" y por le toch sinfonich "Bletterbach", che gnará portades dant dal’orchestra Haydn te na premiera a livel internazional ai 19 de jené a Trënt y ai 5 de forá a Balsan. Les tematiches tratades é problematiches atuales vites dai jogn protagonisć te na realté tecnologica y soziala che se damana la perfeziun estetica cun referimënc a figöres fora dla mitologia classica. Por le toch Bletterbach él gnü traté dles prospetives ambientales dl dagní.
Le componist Rusconi á incunté les classes ai 11 de jené y te chësta ocajiun él ince gnü traté dl rode dl’educaziun musicala por na recostruziun culturala tla sozieté y por la concretisaziun de n conzet inovatif de educaziun, che portes ala valorisaziun dla cultura umanistica y dla creativité te na sinergia costrutiva cun les nöies tecnologies.
Porater é l’opera musicala gnüda presentada sciöche sperimentaziun artistica a livel global tl contest dl iperrealism imersif, cun le rode atif dl publich tla rapresentaziun, i elemënc eletronics y digitai adöm cun i stromënc musicai classics.
Les operes realisades dai scolars y dales scolares vëgn publicades adöm cun na descriziun dl laur ti programs musicai partis fora al publich dai conzerc y sön i canai social dla Fondaziun Haydn, insciö che le laur artistich y la scora á na gran visibilité te n contest musical a livel profescional y a livel regional. Le proiet jará inant cun na pert de feedback te classa y na mostra dles operes.
Le proiet é gnü coordiné da Susy Rottonara en colaboraziun cun i insegnanc Margareth Forer, Verena Costamoling, Markus Delago, Andreas Linder y Sara Welponer.
USP
Galaria dales fotografies
